காஞ்சிபுரம் மாவட்டம் திருப்போரூரில் செயல்பட்டு வரும் எஸ்.எஸ்.என்., இன்ஜினியரிங் கல்லூரிக்குச் சொந்தமான பஸ், சென்னை மயிலாப்பூரிலிருந்து கல்லூரி நோக்கி சென்று கொண்டிருந்தது. பஸ் பழைய மாமல்லபுரம் சாலையில் சென்று கொண்டிருந்த போது, முன்னால் சென்ற காரை முந்தி செல்ல முயன்றுள்ளது. அப்போது டிரைவரின் கட்டுப்பாட்டை மீறி, சாலையோர மின்கம்பத்தில் மோதி கவிழ்ந்தது. இதில் 10 மாணவிகளும், 8 மாணவர்களும் காயமடைந்தனர். பத்மபிரியா என்ற மாணவிக்கு கால்முறிவு ஏற்பட்டது. காயமடைந்தவர்கள் கேளம்பாக்கம் செட்டிநாடு மருத்துவமனையில் அனுமதிக்கப்பட்டுள்ளனர். கேளம்பாக்கம் போலீசார் விசாரணை நடத்தி வருகின்றனர்.