ஒவ்வொரு ஆண்டும், போலீஸ் துறையில் சிறப்பாகப் பணியாற்றிய அதிகாரிகளுக்கு, ஜனாதிபதியின் பதக்கம், சுதந்திர தினத்தை முன்னிட்டு அறிவிக்கப்படும். இதில், சி.பி.ஐ., அதிகாரிகளும் அடக்கம். இந்தாண்டிற்கான ஜனாதிபதி பதக்கத்திற்கு, சி.பி.ஐ.,யில் இருந்து, 24 பேர் தேர்வு செய்யப்பட்டுள்ளனர். இவர்களில், சென்னை சி.பி.ஐ., ஊழல் தடுப்புப் பிரிவைச் சேர்ந்த, கூடுதல் எஸ்.பி., பத்மகுமார் மற்றும் டி.எஸ்.பி., மணி ஆகியோருக்கும் பதக்கம் அறிவிக்கப்பட்டுள்ளது. இதில், பத்மகுமார், கடந்த 1984ம் ஆண்டு சி.பி.ஐ.,யில் சேர்ந்துள்ளார். நாட்டின் பல இடங்களில், சி.பி.ஐ., பிரிவுகளில் பணியாற்றியுள்ள இவர், ஊழல் தடுப்பு தொடர்பான, பல்வேறு முக்கிய வழக்குகளில், சிறப்பாகப் பணியாற்றியுள்ளார். இதற்காக, இவருக்கு ஜனாதிபதி பதக்கம் அறிவிக்கப்பட்டுள்ளது.