எருமப்பட்டி: பவித்திரம் பஸ் ஸ்டாப், எருமப்பட்டி பிரிவு சாலையில் விபத்தை தடுக்க சிக்னல் விளக்கு அமைக்க கோரிக்கை எழுந்துள்ளது.

எருமப்பட்டி யூனியனில் உள்ள பவித்திரம் பஸ் ஸ்டாப்பில் இருந்து எருமப்பட்டி ‍செல்லும் சாலை மிக குறுகலாக இருந்ததால், சில ஆண்டுகளுக்கு முன் அடிக்கடி விபத்து ஏற்பட்டு வந்தது. இதனால் இந்த சாலையை விரிவுபடுத்தி, இரண்டு பக்கங்களிலும் சாலை அமைத்து, நடுவில் தடுப்புகள் அமைக்கப்பட்டுள்ளது. இந்த சாலை நடுவே தடுப்பு இருக்கும் இடத்தில் எச்சரிக்கை விளக்கு அல்லது ஒளிரும் ஸ்டிக்கர்கள் இல்லாததால், இரவில் துறையூரில் இருந்து அதிவேகமாக வரும் வாகனங்கள் அடிக்கடி தடுப்பில் மோதி விபத்துக்குள்ளாகின்றன.

எனவே, இந்த சாலை நடுவே உள்ள தடுப்பு முன் வேகத்தடை அமைத்து, சிகப்பு நிற சிக்னல் அல்லது ஒளிரும் ஸ்டிக்கர்கள் அமைக்க வேண்டும் என வாகன ஓட்டிகள் கோரிக்கை விடுத்துள்ளனர்.