மணலிபுதுநகர்:மணலி மண்டலம், 15 மற்றும் 16வது வார்டுகளை உள்ளடக்கிய மணலிபுதுநகர் அதன் சுற்றுவட்டார பகுதிகளில், 10,000க்கும் மேற்பட்ட குடியிருப்புகள் உள்ளன.

வளர்ச்சியடைந்து வரும் பகுதி என்பதால், நாளுக்கு நாள் குடியிருப்புகளின் எண்ணிக்கையும், மக்களின் புழக்கமும் அதிகரித்தபடி உள்ளது. இப்பகுதியில் இருந்து எழும்பூர் உள்ளிட்ட பகுதிகளுக்கு இயக்கப்படும் பேருந்துகள், போதிய அளவில் இல்லை. இதனால், பெரும்பாலான வேளைகளில் ஆட்டோக்களை நாட வேண்டியுள்ளது.

'ஆட்டோ ஓட்டுனர்களும் இது தான் நேரம்' என, அதிக கட்டணம் பெற்று, சவாரி ஏற்றி செல்கின்றனர். இருசக்கர வாகனங்கள், மற்றும் இலகுரக வாகனங்களை பயன்படுத்த முயற்சித்தாலும், கன்டெய்னர், டிரெய்லர் லாரி போக்குவரத்து காரணமாக, விபத்து அச்சம் நிலவி வருகிறது.

சென்னை மற்றும் விரிவாக்கப்பட்ட பகுதிகளில், மினி பேருந்து சேவை உள்ளது. இது பயணியருக்கு பெரும் உதவிகரமாக உள்ளது. அந்த வகையில், மணலியில் இருந்து விம்கோ நகர் மெட்ரோ ரயில் நிலையத்திற்கு மினி பேருந்து சேவை உள்ளது.

ஆனால், அதிக தொழிற்சாலைகள், குடியிருப்புகள் உள்ள மணலிபுதுநகரில் இருந்து, மினி பேருந்து சேவை கிடையாது. எனவே சம்பந்தப்பட்ட அதிகாரிகள் ஆய்வு செய்து, மணலிபுதுநகர் - விம்கோ நகர் மெட்ரோ நிலையத்திற்கு, மினி பேருந்துகள் இயக்க நடவடிக்கை எடுக்க வேண்டும் என, பகுதிமக்கள் கோரிக்கை விடுத்துள்ளனர்.