PUBLISHED ON : ஜூலை 05, 2024 12:00 AM
பா.ம.க., தலைவர் அன்புமணி: விக்கிரவாண்டியில், தி.மு.க.,வினரால் வாக்காளர்களுக்கு வழங்கப்பட்டு வந்த வேட்டி, சேலைகளை, பா.ம.க.,வினர் கைப்பற்றி அதிகாரிகளிடம் ஒப்படைத்துள்ளனர். விக்கிரவாண்டியில் தோல்வியடைந்து விடுவோம் என்று அஞ்சி நடுங்கும் தி.மு.க., வாக்காளர்களை விலை கொடுத்து வாங்கவும், தேர்தல் நடைமுறையை சீர்குலைக்கவும் முயற்சிக்கிறது.
டவுட் தனபாலு: வாக்காளர்களுக்கு கொடுக்க இருந்ததை தட்டி பறிச்சு, அதிகாரிகளிடம் குடுத்துட்டீங்களே... உங்களுக்கு ஓட்டு போடலாமான்னு யோசனை பண்ணிட்டு இருந்தவங்க கூட, இனிமே, ஓட்டு போடணுமான்னு சிந்திக்க துவங்கிடுவாங்க என்பதில், 'டவுட்'டே இல்லை!
மத்திய பெட்ரோலிய துறை இணை அமைச்சர் சுரேஷ் கோபி: பெட்ரோலியம் என்பதுமுற்றிலும் தொழில்நுட்பம் சம்பந்தப்பட்டவை. பெட்ரோல் விலை குறைப்பது பற்றி மட்டும் யோசிக்காதீர்கள்; அதற்கு சரியான வழி எது என்பது குறித்து யோசிக்க வேண்டும். கச்சா எண்ணெய், சுத்திகரிக்கப்பட்ட எண்ணெய் பற்றி, நாம் அனைவரும் புரிந்து கொண்டால், விலை குறைப்பு பற்றி கேள்வி வராது.
டவுட் தனபாலு: புதுசா பதவியேற்ற மத்திய அமைச்சர்கள், 'இது குறித்து ஆலோசித்து முடிவு எடுக்கப்படும்'னு பொத்தாம் பொதுவா பதில் சொல்லிட்டு நழுவிடுவாங்க... ஆனா, 'விலை குறைப்பை பத்தி எல்லாம் யோசிக்க கூடாது' என்று உண்மையை பளிச்சுன்னு பேசிய உங்களை, 'டவுட்'டே இல்லாம பாராட்டலாம்!
முன்னாள் முதல்வர் ஜெ.,யின் தோழி சசிகலா: அ.தி.மு.க., ஒருங்கிணைப்பு பணி 90 சதவீதம் நன்றாக உள்ளது. இன்னும் 10 நாட்களில் தமிழகம் முழுதும் சுற்றுப்பயணம் செல்ல உள்ளேன்; விபரம் விரைவில் அறிவிக்கப்படும். இது, அ.தி.மு.க., தொண்டர்களுக்கு உற்சாகத்தை அளிக்கும். என்னுடன் வருவோரை, சுற்றுப்பயணத்தின் போது தெரிந்து கொள்வீர்கள்.
டவுட் தனபாலு: நீங்க தான், ஒருங்கிணைப்பு பணிகள் சூப்பரா நடக்குதுன்னு சொல்றீங்க... ஆனா, அ.தி.மு.க., என்ற ஆலமரத்தில் சிறிய சலசலப்பு கூட ஏற்பட்ட மாதிரி தெரியலையே... எனவே, உங்க சுற்றுப்பயணம் என்பது, வேனுக்கு வெட்டியா டீசல் செலவை தான் தரும் என்பதில், 'டவுட்'டே இல்லை!