மதுரை:கூட்டணிக் கட்சிகளுக்கு அதிர்ச்சியளிக்கும் வகையில், மாநகராட்சி மேயர், நகராட்சித் தலைவர் வேட்பாளர்களை, அ.தி.மு.க., அறிவித்தது குறித்து கருத்து தெரிவிக்க, தே.மு.தி.க., தலைவர் விஜயகாந்த் மறுத்துவிட்டார்.சட்டசபைத் தேர்தலில், அ.தி.மு.க., கூட்டணியில் வெற்றி பெற்ற தே.மு.தி.க., எதிர்க்கட்சி அந்தஸ்து பெற்றது.

இந்நிலையில், நடந்து முடிந்த சட்டசபை கூட்டத்தொடரில், 'எங்களுக்கு பாலபாடம் நடத்த வேண்டாம்' என்று, தே.மு.தி.க.,வுக்கு எதிராக, முதல்வர் ஜெயலலிதா கோபமாகக் கூறி அதிர்ச்சியை ஏற்படுத்தினார். இது, கூட்டணி பிளவுக்கு அச்சாரமாக இருக்கலாம் என கருதப்பட்டது.சட்டசபைத் தேர்தலின் போது, கூட்டணிக் கட்சிகளை ஆலோசிக்காமல், வேட்பாளர்களை தன்னிச்சையாக அறிவித்தது போல், உள்ளாட்சித் தேர்தலுக்கான வேட்பாளர்களையும், அ.தி.மு.க., அறிவித்தது. இது, கூட்டணிக் கட்சிகளுக்கு அதிர்ச்சியை ஏற்படுத்தியது.

இது குறித்து, தே.மு.தி.க., தரப்பில், இதுவரை எந்த பதிலும் வராத நிலையில், கட்சித் தலைவர் விஜயகாந்த், நேற்று மதுரை வந்தார். பரமக்குடி துப்பாக்கிச் சூட்டில் காயமடைந்து, அரசு மருத்துவமனையில் சிகிச்சை பெறுபவர்களிடம் நலம் விசாரித்தார்.