ராசிபுரம்: 'ராசிபுரம்-புதுப்பாளையம் ரோடு, வீ .நகர், டி.வி.எஸ்., சாலை வழியாக செல்லும் ஒரு வழிச்சாலையில் விபத்து தவிர்க்கும் வகையில், வேகத்தடை அமைக்க வேண்டும்' என, மக்கள் கோரிக்கை விடுத்துள்ளனர்.

போக்குவரத்து நெரிசலை தவிர்க்க, ஒருவழி பாதை செயல்படுத்தப்பட்டு வருகிறது. பழைய பஸ் ஸ்டாண்டில் இருந்து புதுப்பாளையம் ரோடு, வீ .நகர், டி.வி.எஸ்., சாலை வழியாக, காலை 8 மணி முதல் இரவு 8 மணி வரை வாகனங்கள் செல்ல வேண்டும். அதில், டி.வி.எஸ்., சாலையில் நகராட்சி நடுநிலைப்பள்ளியும், அண்ணா சாலை அரசு மேல்நிலைப்பள்ளியின் பின்புற வாசலும் உள்ளது. மேலும், அச்சாலையில் கல்யாண மண்டபம், வர்த்தக நிறுவனங்கள் செயல்பட்டு வருகிறது. குறுகலான சாலை என்பதுடன், அதிவேகமாக வாகனங்கள் செல்வதால், விபத்துகளும் நடக்கிறது. இதைத் தவிர்க்க, அதி வேகமாக செல்லும் வாகனங்களை கட்டுப்படுத்த, சி.பி. கண்ணையா தெரு, எல்லப்பா தெரு மற்றும் டி.வி.எஸ்., சாலை ஆகிய மூன்று இடங்களில் வேகத்தடை அமைக்க வேண்டும் என, பொதுமக்கள் கோரிக்கை விடுத்துள்ளனர். ஏற்கனவே மேற்குறிப்பிட்ட இடங்களில் வேகத்தடை செயல்பட்டு வந்தது. இச்சூழலில் புதிதாக தார் ரோடு அமைத்தபோது, வேகத்தடை அகற்றப்பட்டது. விபத்து தவிர்க்கும் நோக்கில், மீண்டும் அப்பகுதியில் வேகத்தடை அமைக்க வேண்டும் என்பதே, மக்களின் கோரிக்கை.