நமது உடலை பேணிக்காப்பது மிகவும் முக்கியம். உடற்பயிற்சி செய்யலாம்; நடைபயிற்சி செய்யலாம். எதுவாக இருந்தாலும் 'பிட்'டாக வைத்துக் கொண்டால், நோயின்றி வாழலாம். இதற்காகவே பலரும் பல வகைகளில் மெனக்கெடுகின்றனர்.

கோவை அரசு மருத்துவமனை புற்றுநோய் நிபுணர் செல்வராஜ், தினமும் எத்தகைய பயிற்சி மேற்கொள்கிறாரென, நமது வாசகர்களுக்காக கூறியது:

தினமும் காலையில் ஒரு மணி நேரம் ஜிம்முக்கு செல்வேன். மாலையில் ரேஸ்கோர்ஸ் சுற்றுவட்டச் சாலையில் ஒரு மணி நேரம் 'வாக்கிங்' சென்று விடுவேன். உடற்பயிற்சியை பலர் சிரமமாக நினைக்கின்றனர்; தினந்தோறும் செய்தால் புத்துணர்ச்சி அளிக்கும்.

உடற்பயிற்சியில் கார்டியோ, எடை துாக்குதல், தசை பயிற்சி ஆகிய மூன்றையும் சரிவிகிதத்தில் செய்து விடுவேன். தினமும் இம்மூன்று பயிற்சிக்கும், 20 நிமிடம் திட்டமிட்டால் போதும்; 80 வயதிலும் எளிதாக தரையில் அமர்ந்து எழுந்திருக்கலாம்.

சாப்பிடும் அளவை, எந்த தரத்தில் எடுக்கிறோம் என்பது முக்கியம். பாமாயில், ஒரு முறை பயன்படுத்திய ஆயிலை முற்றிலும் தவிர்த்து விடுவேன். வீடுகளில் சமைத்து சாப்பிடுவதை விரும்புவேன்; மாதத்துக்கு இரண்டு, மூன்று முறை நண்பர்களுடன் வெளியே சென்று சாப்பிடுவது தவிர்க்க முடியாது. தற்போது காலையில் இட்லி, தோசை தவிர்த்து சுண்டல், பச்சை பயறு மட்டும் 150 கிராம் எடுத்துக் கொள்கிறேன். மதியம் வழக்கமான உணவு, இரவு 8 மணிக்கு முன் சாப்பிட்டு விடுவேன்; 10.30 மணிக்கு உறங்கச் சென்று விடுவேன்.