அருப்புக்கோட்டை, : அருப்புக்கோட்டையில் கால்வாய் பணிகளை கிடப்பில் போட்டதை கண்டித்து மக்கள் ரோடு மறியலில் ஈடுபட்டனர்.

அருப்புக்கோட்டை பழைய பஸ் ஸ்டாண்ட் அருகே வேலாயுதபுரம் பகுதியில் கழிவு நீர் கால்வாய் கட்டும் பணி நடந்தது. 2 மாதங்களுக்கு முன்பு பழைய கழிவுநீர் கால்வாய் பாலங்கள் உடைக்கப்பட்டு கால்வாய் பணிகளுக்காக தோண்டப்பட்டது.

ஆனால், கம்பி கட்டும் பணியை மட்டும் செய்துவிட்டு கிடப்பில் போட்டு விட்டனர். இதனால் அப்பகுதியைச் சேர்ந்த மக்கள் 2 தெருக்களை சுற்றி செல்ல வேண்டிய நிலை ஏற்பட்டது.

அப்பகுதியைச் சேர்ந்தவர்கள்நேற்று மாலை மதுரை ரோட்டில் ரோடு மறியல் செய்தனர். போலீசார் சமாதானம் செய்தனர். நகராட்சி அதிகாரிகள் பால பணிகளை விரைவில் முடிக்கப்படும் என உறுதி அளித்ததன் பேரில் மக்கள் கலைந்து சென்றனர்.