சிவகங்கை, : குன்றக்குடி சண்முகநாத பெருமான் கோயிலில் ஏப்.,2 ல் கொடியேற்றத்துடன் பங்குனி உத்திர திருவிழா துவங்குகிறது.

குன்றக்குடி ஆதின மடத்திற்கு சொந்தமான குன்றக்குடி சண்முக நாத பெருமான் கோயிலில், பங்குனி உத்திர திருவிழா விமரிசையாக நடைபெறும். ஏப்., 1 அன்று மாலை 5:00 மணிக்கு அனுக்கை, விக்னேஸ்வர பூஜை நடைபெறும்.

ஏப்., 2ம் தேதி அதிகாலை 5:00 மணி முதல் 5:45 மணிக்குள் கொடியேற்றத்துடன் பங்குனி உத்திர திருவிழா துவங்கும். விழாவை முன்னிட்டு தினமும் இரவு 8:00 மணிக்கு வள்ளி, தெய்வானையுடன் சண்முக நாத பெருமான் வெள்ளி கேடக வாகனத்தில் வீதி உலா வருவார். ஏப்., 6ம் தேதி மாலை 6:00 மணிக்கு வள்ளி முருகன் திருக்கல்யாணம் நடைபெறும்.

அன்று இரவு 9:00 மணிக்கு பூப்பல்லக்கு நடைபெறும். ஏப்., 8 ம் தேதி இரவு 8:00 மணிக்கு தங்கரத புறப்பாடு நடைபெறும். திருவிழாவின் எட்டாம் நாளான ஏப்., 9ம் தேதி இரவு 8:00 மணிக்கு வையாபுரி தெப்பத்தில் தெப்ப உற்சவம் மற்றும் இரவு வெள்ளி ரத புறப்பாடும் நடைபெறும். ஒன்பதாம் நாளான ஏப்., 10ம் தேதி காலை 5:30 மணிக்கு அலங்கரிக்கப்பட்ட தேரில் வள்ளி, தெய்வானையுடன் முருகன் எழுந்தருள்வார்.

அன்று மாலை 4:30 மணிக்கு குன்றக்குடி பொன்னம்பல அடிகள் தேர் வடம் பிடித்து துவக்கி வைக்க, தேரோட்டம் நடைபெறும்.

பத்தாம் நாளான ஏப். 11 அன்று காலை 11:15 மணிக்கு தெப்பக்குளத்தில் தீர்த்தவாரி உற்ஸவம் நடைபெறும்.

அன்று இரவு 8:00 மணிக்கு மயிலாடும்பாறையில் சுவாமி எழுந்தருளலுடன் பங்குனி உத்திர திருவிழா நிறைவு பெறும்.