சேலம், :சேலத்துக்கு வரும், 11,12ல் முதல்வர் வருகை தருவதையொட்டி, அனைத்து முன்னேற்பாடுகள் குறித்த ஆலோசனை கூட்டம், கலெக்டர் அலுவலகத்தில் நடந்தது.

கூட்டத்துக்கு பின், கலெக்டர் பிருந்தாதேவி கூறியதாவது: டெல்டா பாசனத்துக்காக வரும், 12ல், மேட்டூர் அணை திறப்பையொட்டி, அப்பகுதியில் 2 ஆம்புலன்ஸ், சேலத்தில் விழா நடக்கும் அரசு மருத்துவக்கல்லுாரி வளாகத்தில் 2 ஆம்புலன்ஸ் என, மொத்தம் 4 ஆம்புலன்ஸ் சேவைக்கு ஏற்பாடு செய்யப்பட்டுள்ளது.

தமிழக முதல்வர் பங்கேற்கும் விழா மேடை மற்றும் நிகழ்ச்சியை ஒளிபரப்பும் ஒவ்வொரு எல்இடி., 'டிவி'க்கும் தீயணைப்பு வீரர்கள், போலீசார் பாதுகாப்பு மேற்கொள்வர். முதல்வர் தங்கும் விருந்தினர் மாளிகை, புதுப்பொலிவு பெற செய்து, 4 ஆண்டு சாதனை விளக்க வரைப்படங்கள் வைக்க பொதுப்பணித்துறை நடவடிக்கை மேற்கொள்ளும்.

மதியம், 2:00 மணியளவில் பயனாளிகளை, மேடைக்கு அழைத்து வருதல், விழா மேடையில் அரங்கேற்றப்படும் கலை நிகழ்ச்சிக்கு காலை, 8:00 - 1:00 மணி வரை மட்டும் அனுமதி வழங்குதல் உள்பட பல்வேறு நடவடிக்கைகள் மேற்கொள்ளப்பட்டுள்ளது.

இவ்வாறு கூறினார்.