பரமக்குடி : திருச்சியில் நடந்த மாநில அளவிலான 96 வது சீனியர் தடகள போட்டியில் பரமக்குடி விளையாட்டு வீரர்கள் சாதனை படைத்தனர்.

இந்தப் போட்டிகளில் ராமநாதபுரம், சிவகங்கை, துாத்துக்குடி, சென்னை என மாநில முழுவதும் இருந்து பல ஆயிரம் வீரர், வீராங்கனைகள் கலந்து கொண்டனர்.

மேலும் தமிழ்நாடு காவல் துறை, ரயில்வே துறை, வருமானவரி துறைகளில் பணிபுரியும் விளையாட்டு வீரர்களும் பங்கேற்றனர்.

இதில் ராமநாதபுரம் மாவட்டம் பரமக்குடி அசுகரன் விளையாட்டு கழகம் சார்பில் கலந்து கொண்ட சர்மிளா பெண்களுக்கான குண்டு எறிதலில் 2ம் இடம் பெற்று வெள்ளி பதக்கம் வென்றார். தொடர்ந்து ஹரியானாவில் நடக்க உள்ள தேசியப் போட்டிக்கு தேர்வானார்.

மேலும் 400 மீ., தொடர் ஓட்டத்தில் ரோகித் மூன்றாம் இடம் பெற்று வெண்கலப் பதக்கம் பெற்றார். இவரை விளையாட்டு கழக பயிற்சியாளர் அருண் மற்றும் பெற்றோர் பாராட்டினர்.

இதே போல் சர்மிளா கடந்த வாரம் சென்னையில் நடந்த தேசிய அளவிலான தடகள போட்டியில் குண்டு எறிதலில் 2ம் இடம் பிடித்தார்.