கிருஷ்ணகிரி: கிருஷ்ணகிரி மாவட்டத்தில் 'மக்களுடன் முதல்வர்' திட்டம் 2-வது கட்டமாக ஊரக பகுதிகளில் நாளை முதல் (11-ம் தேதி) வரும், ஆக., 30 வரை நடக்கிறது என கலெக்டர் சரயு தெரிவித்தார்.கிருஷ்ணகிரி மாவட்ட ஊரக பகுதிகளில், 'மக்களுடன் முதல்வர்' திட்டம் தொடங்கப்பட உள்ளதை முன்னிட்டு, மாவட்ட கலெக்டர் அலுவலகத்தில் ஆலோசனை கூட்டம் நடந்தது.

கலெக்டர் சரயு தலைமை வகித்து பேசியதாவது: 'மக்களுடன் முதல்வர்' திட்டம், 2-வது கட்டமாக ஊரக பகுதிகளில் செயல்படுத்தும் விதமாக நாளை (11-ம் தேதி), தர்மபுரி மாவட்டத்தில் முதல்வர் ஸ்டாலின் தொடங்கி வைக்கிறார்.அதன் படி, கிருஷ்ணகிரி மாவட்டத்திலும் நாளை முதல் வரும் ஆக., 30-ம் தேதி வரை இத்திட்டம் நடக்கிறது. நாளை கிருஷ்ணகிரி ஒன்றியம் அகசிப்பள்ளி கிராமத்திலும், பர்கூர் ஒன்றியத்தில் கொண்டப்பநாயனப்பள்ளி கிராமத்தில், அரசு உயர்நிலைப்பள்ளி வளாகத்திலும் காலை, 10:00 மணி முதல் மாலை, 3:00 மணி வரை நடக்கவுள்ளது. எனவே, பொதுமக்கள் மேற்காணும் முகாம் நாட்களில், அவரவர் வசிக்கும் பகுதிகளில் நடக்கும் முகாம்களில் கலந்து கொண்டு பயன்பெறலாம். இவ்வாறு, அவர் பேசினார்.