சென்னை : 'வீ ஆர் பார் ஹாக்கி' அமைப்பு சார்பில், நான்காம் ஆண்டிற்கான வீ ஆர் பார் கோப்பைக்கான மகளிர் ஹாக்கி போட்டி, எழும்பூர் ராதாகிருஷ்ணன் ஹாக்கி அரங்கில் நடக்கிறது. 16 அணிகள் மோதுகின்றன.

நேற்று காலை நடந்த லீக் ஆட்டத்தில், எஸ்.ஆர்.எம்., பொறியியல் அணி மற்றும் மேஜர் ஜான்ஸ் ராபர்ட் அகாடமி மோதியது. அதில், 5 - 2 என்ற கணக்கில் எஸ்.ஆர்.எம்., அணி வெற்றி பெற்றது.

இதுவரை நான்கு பிரிவில் நடந்த அனைத்து 'லீக்' போட்டிகள் முடிவில், 'ஏ' பிரிவில், ஈரோடு பி.கே.ஆர்., அணி; 'பி' பிரிவில், ஆர்.வி., அகாடமி; 'சி' பிரிவில் எஸ்.ஆர்.எம்., பொறியியல் கல்லுாரி; 'டி' பிரிவில், எஸ்.ஆர்.எம்., கலைக் கல்லுாரி அணிகள் முதலிடத்தை பிடித்து, அரையிறுதி ஆட்டங்களுக்கு தகுதி பெற்றன.

இன்று நடக்கும் இரண்டு அரையிறுதி ஆட்டங்களில் பி.கே.ஆர்., - ஆர்.வி., அகாடமி, எஸ்.ஆர்.எம்., கலை - எஸ்.ஆர்.எம்., பொறியியல் அணிகள் எதிர்கொள்கின்றன.