மலைய உடைக்கறாங்க... 'கப்பம்' வாங்கிட்டு காவல் இருக்காங்க!

உடுமலை தாசில்தார் ஆபீஸ்ல, சுற்றுச்சூழல் ஆர்வலரா இருக்கற நண்பரை சந்திச்சேன். அவர் சொன்னதில் இருந்து... உடுமலை அருகே, 3 ஆயிரம் ஏக்கர் பரப்புல ஜம்புக்கல் மலை இருக்கு. இந்த மலைய தனியார் ஆக்கிரமித்து, பாறைய வெடி வைத்து உடைத்து, மரங்களை வெட்டி, பசுமையான மலையை அழிச்சுட்டு இருக்காங்க. சமதள பரப்பில் அனுபவ பட்டா அடிப்படையில் விவசாயம் செய்தும், ஆடு, மாடுகள் மேய்க்கற விவசாயிகளையும் ஜம்புக்கல் மலைப்பகுதிக்குள்ள நுழைய விடாம தடுக்கறாங்க. அரசுக்கு சொந்தமான மலைய அழிக்கறத தடுக்க விவசாயிகள் போராட்டம் நடத்தியும், வனத்துறை, வருவாய்த்துறை, கனிம வளத்துறை மற்றும் போலீசார் என, யாருமே கண்டுக்கல. எல்லாருமே ஆக்கிரமிப்பாளர்களுக்கு சாதகமாக இருக்காங்கலாம். இப்ப, கனரக இயந்திரங்களை கொண்டு வந்தும், சக்தி வாய்ந்த வெடி பொருட்களை கொண்டும் மலைய துாள் துாளா உடைக்கறத புகார் கொடுத்தாலும், 'நாங்கள் என்ன செய்யறதுனு' அதிகாரிக அலட்சியமா பதில் சொல்லறாங்க. ஆவேசமடைந்த விவசாயிகள், தாலுகா அலுவலகத்தில் முற்றுகை போராட்டம் நடத்தியதோடு, வாகனங்களை பறிமுதல் செய்யணும், அத்துமீறுவோரை கைது செய்யணும்னு கோரிக்கை விடுத்தாங்க. ஆனா, பல லட்சம் ரூபா மதிப்புள்ள இயந்திரங்கள பறிமுதல் செய்யக்கூடாதுனு, ஆக்கிரமிப்பாளர்களுக்கு சாதகமா, அதிகாரிகள் 'ரகசிய டீலிங்' பேசி, ராத்திரியோடு ராத்திரியா கனரக இயந்திரங்களை சமவெளிக்கு இறக்கிட்டாங்க. விடிஞ்சதும் மலைய உடைக்கற கனரக வாகனங்கள அதிகாரிக பறிமுதல் செய்வாங்க, ஏதாவது நடவடிக்கை எடுப்பாங்கனு எதிர்பார்த்திருந்த விவசாயிகளுக்கு ஏமாற்றமே மிஞ்சியது. அதனால, கரை படிந்த அதிகாரிகள கலங்கடிக்கற மாதிரியும், அரசாங்கத்தோட கவனத்த ஈர்க்கற மாதிரியும் போராட்டம் நடத்த விவசாயிகள் திட்டமிட்டிருக்காங்கனு, விவரமா சொன்னார்.