இப்போது வரை இழுபறி!

சென்னைக்கு அடுத்ததாக ரியல் எஸ்டேட் மற்றும் கட்டுமானத் துறையில், கோவை மிகப்பெரிய வளர்ச்சியை அடைந்து வருகிறது. இன்னும் சொல்லப்போனால், சென்னையை விட கோவையில் வீடுகள் விற்பனை விகிதாச்சாரம் அதிகரித்துள்ளது.ஆனால் லே அவுட் மற்றும் கட்டுமானங்களுக்கு திட்ட அனுமதி பெறுவதற்கு அதீதமான லஞ்சம் தர வேண்டியுள்ளது; தந்தாலும் அசாத்தியமான தாமதம் ஏற்படுகிறது.இதற்குத் தீர்வு காணும் வகையில், சென்னை பெருநகர வளர்ச்சிக் குழுமம் போலவே, கோவையிலும் நகர்ப்புற மேம்பாட்டு ஆணையம் (சி.யு.டி.ஏ.,) துவக்குவதற்கு, இரண்டு ஆண்டுகளுக்கு முன்பே அரசாணை வெளியிடப்பட்டது.அதற்கான ஒரு ஐ.ஏ.எஸ்., அதிகாரியும் நியமிக்கப்பட்டார். எந்த வேலையுமே நடக்காமல், அவரும் மாற்றப்பட்டார்; அதன்பின் அது என்னவானது என்றே தெரியவில்லை. இந்த ஆணையம் அமைப்பதற்கும், கோவைக்கான புதிய மாஸ்டர் பிளானை நடைமுறைப்படுத்துவது மிகவும் அவசியமாகவுள்ளது.கோவை மாவட்டத்துக்கான பொறுப்பு அமைச்சராக, இந்தத் துறையின் அமைச்சர் முத்துசாமி இருந்தாலும், இந்த இரண்டு விஷயங்களும் இவ்வளவு கால தாமதம் ஆவதற்கான காரணம்தான் புரியாத புதிராகவுள்ளது.இரண்டுமே நடக்காவிட்டால், எதிர்க்கட்சிகள் சொல்வது போல, இது அறிவிப்பு அரசு என்பது உறுதியாகி விடும்!