சென்னை, 'கனிமங்களை ஏற்றி செல்லும் வாகனங்களுக்கு, இன்று முதல் ஆன்லைனில் மட்டுமே 'இ- டிரான்சிட்' எனும் இடைகடவு சீட்டு வழங்கப்படும்' என, சென்னை கலெக்டர் ரஷ்மி சித்தார்த் ஜகடே தெரிவித்துள்ளார்.

இதுகுறித்து, அவர் வெளியிட்ட செய்திக்குறிப்பு :

சாதாரண வகை கற்கள், ஜல்லி மற்றும் செயற்கை மணல்களை கொண்டு செல்லுவதற்கு, சென்னை மாவட்டத்தில் டிரான்ஸிட் பாஸ் எனப்படும், 'இடைகடவு சீட்டு' வழங்கப்பட்டு வந்தது.

தற்போது, அரசின் வழிகாட்டுதல்படி, இன்று முதல் இடைகடவு சீட்டிற்கு, https://mimas.tn.gov.in என்ற இணையதளத்தில் மட்டுமே சமர்ப்பிக்க வேண்டும். நடைச்சீட்டு அடிப்படையில், 'இ - டிரான்சிட் பாஸ்' இணையதளத்திலேயே வழங்கப்படும்.

இதனால், ஏற்றி செல்லும் கனிமங்கள் முழுமையாக கண்காணிக்கப்பட்டு, விற்பனையும் வெளிப்படையாக அமையும். எனவே, இ- டிரான்சிட் பாஸ் பெற, இணைதயளத்தை பயன்படுத்திக் கொள்ளலாம்.

இவ்வாறு அதில் கூறப்பட்டுள்ளது.