திருவொற்றியூர், திருவொற்றியூரில் கலைக்கல்லுாரிக்கு, புதிய பேருந்து நிலையம் அருகே, ரீட் கூட்டுறவுக்கு சொந்தமான, 2.14 ஏக்கர் நிலத்தில், 16 கோடி ரூபாய் செலவில், 18 வகுப்பறைகளுடன் புது கட்டடம் கட்ட ஏற்பாடு செய்யப்பட்டது. கடந்தாண்டு மார்ச்சில் திருவொற்றியூர் தி.மு.க., - எம்.எல்.ஏ., கே.பி.சங்கர் அடிக்கல் நாட்டினார்.

தற்போது, கட்டுமான பணிகள், 75 சதவீதம் முடிந்துள்ளன. பணிகள் துரிதப்படுத்தப்பட்டு, அடுத்த மாதம் இந்த கட்டடம் பயன்பாட்டிற்கு கொண்டு வரப்படும் எனக் கூறப்படுகிறது.

புதிய கல்லுாரி கட்டடம் பயன்பாட்டிற்கு வரும் நிலையில், இதுவரை பி.காம்., - பி.சி.ஏ., - பி.ஏ., உள்ளிட்ட ஐந்து கலை பிரிவு படிப்புகள் மட்டுமே செயல்பட்டு வரும் நிலையில், கூடுதலாக அறிவியல் பாடப்பிரிவுகளுக்கான படிப்புகள் இடம் பெறும்.

இதனால், மத்திய சென்னையை நோக்கி படையெடுக்கும் வடசென்னை மாணவர்களின் கல்வி தேவை, இங்கேயே பூர்த்தியாகும் என்பது குறிப்பிடத்தக்கது.