வரலாற்று தொடர்புடைய கோவில்

இது குறித்து, திருவொற்றியூர் பாரதி பாசறை செயலர் மா.கி.ரமணன் கூறியதாவது: திருவள்ளுவரின் சீடரான, ஏலேலோ சிங்கர் எனும் ஈழ வணிகர், திருவொற்றியூர், தியாகராஜ சுவாமியின் தீவிர பக்தர் ஆவார். அவர், தியாகராஜருக்கு கொடுப்பதற்காக மாணிக்கம் வைத்திருந்தார்.இறைவன் கனவில் தோன்றி, அதை காசி ஏழைக்கு வழங்கும்படி கூறியதை தொடர்ந்து கொடுத்து விட்டார். பின், உள்நாட்டு அரசர், ஏலேலோ சிங்கரிடம், மாணிக்கம் இருப்பதை அறிந்து, அவரிடம் மாணிக்கம் கேட்டு தொந்தரவு செய்துள்ளார்.இது குறித்து, ஏலேலோ சிங்கர் இறைவனிடம் முறையிடவே, தியாகராஜரே மாணிக்கம் ஒன்றை தந்தார். இதனால், இறைவனுக்கு மாணிக்க தியாகர் என்ற பெயரும் உண்டு. இறைவனை வழிபட வந்த ஏலேலோ சிங்கர், திருவள்ளுவருக்கு கோவில் கட்டியிருக்கலாம் என தெரிகிறது. திருவொற்றியூர், தேரடி, ஈசாணி மூர்த்தி கோவில் தெரு சந்திப்பில், 20 ஆண்டுகளுக்கு முன், திருவள்ளுவர் கோவில் சிதிலமடைந்த நிலையில் இருந்தது. பின் நாளில் காணாமல் போய் விட்டது.திருவொற்றியூர் நலசங்கத்தினர் பல முன்னெடுப்புகளை மேற்கொண்டனர். பாரதி பாசறை தீர்மானங்கள் வாயிலாக வலியுறுத்தி வந்தது. தற்போது, ஹிந்து சமய அறநிலையத்துறை மானிய கோரிக்கையில், 90 லட்ச ரூபாய் மதிப்பில் கோவில் அமைய உள்ளதாக, அறிவிப்பு வெளியாகியுள்ளது.வரலாற்று தொடர்புடைய கோவிலை, மீட்டுருவாக்கம் செய்வதை வரவேற்கிறோம். இவ்வாறு அவர் கூறினார்.