பொலிவிழந்த அசோக துாண்

சென்னை, அசோக் நகர் 100 அடி சாலை மற்றும் அசோக் பில்லர் சாலை சந்திப்பில், அசோக துாண் அமைந்து உள்ளது. இந்த அசோக துாண், நெடுஞ்சாலை துறையின் பராமரிப்பில் உள்ளது.

இங்கு செயற்கை நீரூற்று, புல்வெளி மற்றும் வண்ண விளக்குகள் அமைந்துள்ளன. ஆனால், அவை போதிய பராமரிப்பு இல்லாமல், பொலிவிழந்து காணப்படுகின்றன.

இங்குள்ள செயற்கை நீரூற்று, தண்ணீர் இல்லாமல், பழுதடைந்து செயல்படாமல் உள்ளது. இப்பகுதியின் அடையாளமாக உள்ள அசோக துாணை சீர் செய்ய, சம்பந்தப்பட்ட அதிகாரிகள் நடவடிக்கை எடுக்க வேண்டும்.

கழிப்பறை அருகே குப்பை குவிப்பு

கே.கே.நகர் ராஜமன்னார் சாலை ஆர்.டி.ஓ., மைதானம் அருகே, மாநகராட்சி கழிப்பறை உள்ளது. இந்தகழிப்பறை முன் வரிசையாக ஷேர் ஆட்டோக்கள் நிறுத்தப்பட்டுள்ளன.

இலவச கழிப்பறை வாசலில் மாநகராட்சி சார்பில் குப்பை தொட்டிகள் வைக்கப்பட்டுள்ளன. இந்த மாநகராட்சி கழிப்பறை எதிரே, டாஸ்மாக் அமைந்துள்ளது.

இங்கு மது பாட்டில்கள் வாங்க வரும் நபர்கள், அருகில் உள்ள கடைகளில் இருந்து தண்ணீர், பிளாஸ்டிக் டம்ளர் ஆகியவை வாங்கி விட்டு, மாநகராட்சி கழிப்பறை முன் நிறுத்தப்பட்டுள்ள ஷேர் ஆட்டோக்கள் மறைவில் மது அருந்துகின்றனர்.

பின், அந்த மது பாட்டில்கள், பிளாஸ்டிக் டம்ளர் ஆகியவற்றை, மாநகராட்சி குப்பை தொட்டி அருகே வீசி விட்டுச் செல்கின்றனர். இதனால், குப்பை தொட்டி அருகே அதிக அளவில் பிளாஸ்டிக் டம்ளர் உள்ளிட்டவை குவிந்துள்ளன.

எனவே, பொதுவெளியை திறந்தவெளி மதுக்கூடமாக பயன்படுத்தும் நபர்கள் மீது நடவடிக்கை எடுக்க வேண்டும்.