பூக்கடைகளால் நெரிசல்

பூக்கடைகளால் ஏற்படும் நெரிசல் குறித்து முடிச்சூர்வாசிகள் கூறியதாவது:தாம்பரத்தில், முடிச்சூர் - ஜி.எஸ்.டி., - வேளச்சேரி சாலைகளை இணைக்கும் வகையில், மேம்பாலம் கட்டப்பட்டுள்ளது. முடிச்சூர் சாலை வழியாக இறங்கும் மேம்பாலத்தின் கீழ்ப்பகுதி, முறையாக பராமரிக்கப்படவில்லை. மேம்பால கீழ்ப்பகுதி முழுக்க ஆக்கிரமிப்பின் பிடியில் சிக்கியுள்ளது. அங்கு, ஏகப்பட்ட பூக்கடைகள் உள்ளன. ஆரம்பத்தில், பாலத்தின் கீழ்ப்பகுதியில் இருந்த கடைகள், மெல்ல மெல்ல வெளியே வந்து, தற்போது, அணுகு சாலையை ஆக்கிரமித்துள்ளன.
போட்டி போட்டுக்கொண்டு சாலையிலேயே பூ, மாலைகளை தொங்க விடுகின்றனர். சாலையிலே வாகனங்களை நிறுத்தி பூ, மாலைகளை வாங்குவதால், அதிக போக்குவரத்து உடைய அணுகு சாலையில், தினமும் நெரிசல் ஏற்படுகிறது. அவசரத்திற்கு, ஆம்புலன்ஸ் கூட போகமுடியவில்லை. சாலை ஆக்கிரமிப்புகளை அதிரடியாக அகற்றி வரும் நெடுஞ்சாலைத் துறையும், மாநகராட்சி நிர்வாகமும், இச்சாலைகளிலும் உரிய நடவடிக்கை எடுத்து ஆக்கிரமிப்புகளை அகற்ற வேண்டும்.இவ்வாறு அவர்கள் கூறினர்.