ஜெய்ப்பூர்: புரோ கபடி லீக் போட்டியில் அசத்திய ஹரியானா அணி 40-37 என, குஜராத் அணியை வீழ்த்தியது.

இந்தியாவில், புரோ கபடி லீக் 12வது சீசன் நடக்கிறது. இதில் தமிழ் தலைவாஸ், மும்பை, பெங்கால் உள்ளிட்ட 12 அணிகள் பங்கேற்கின்றன.

ராஜஸ்தான் மாநிலம் ஜெய்ப்பூரில் நடந்த லீக் போட்டியில் ஹரியானா, குஜராத் அணிகள் மோதின. முதல் பாதி முடிவில் ஹரியானா அணி 25-20 என முன்னிலையில் இருந்தது. இரண்டாவது பாதியில் ஓரளவு எழுச்சி கண்ட குஜராத் அணிக்கு 17 புள்ளி கிடைத்தது. ஆட்டநேர முடிவில் ஹரியானா அணி 40-37 என்ற கணக்கில் வெற்றி பெற்றது.

ஹரியானா அணிக்கு ஷிவம் படாரே (12 புள்ளி), வினய் (8), கேப்டன் ஜெய்தீப் (6) கைகொடுத்தனர். குஜராத் சார்பில் ராகேஷ் 14, ஹிமான்ஷு சிங் 6 புள்ளி பெற்றனர். ஹரியானா அணி 5 போட்டியில், 3 வெற்றி, 2 தோல்வி என 6 புள்ளிகளுடன் 7 வது இடத்துக்கு முன்னேறியது. ஐந்தாவது தோல்வியை பெற்ற குஜராத் அணி, 2 புள்ளிகளுடன் 11வது இடத்தில் உள்ளது.

பெங்களூரு வெற்றி: மற்றொரு லீக் போட்டியில் பெங்களூரு, தெலுங்கு டைட்டன்ஸ் அணிகள் மோதின. முதல் பாதி முடிவில் பெங்களூரு அணி 11-14 என பின்தங்கி இருந்தது. பின் எழுச்சி கண்ட பெங்களூரு அணி, ஆட்டநேர முடிவில் 34-32 என்ற கணக்கில் 'திரில்' வெற்றி பெற்றது.

பெங்களூரு அணி 4 வெற்றி உட்பட 8 புள்ளிகளுடன் 4வது இடத்துக்கு முன்னேறியது. தெலுங்கு டைட்டன்ஸ் அணி (6 புள்ளி) 5வது இடத்தில் உள்ளது.