கொழும்பு: இரண்டாவது டெஸ்டில் பதும் நிசங்கா சதம் கடந்து கைகொடுக்க, இலங்கை அணி முன்னிலை பெற்றது.

இலங்கை, வங்கதேசம் அணிகள் மோதும் 2வது டெஸ்ட் கொழும்புவில் நடக்கிறது. முதல் நாள் முடிவில் வங்கதேச அணி முதல் இன்னிங்சில் 220/8 ரன் எடுத்திருந்தது.

இரண்டாம் நாள் ஆட்டத்தில் தைஜுல் இஸ்லாம் (33) ஆறுதல் தந்தார். வங்கதேச அணி முதல் இன்னிங்சில் 247 ரன்னுக்கு 'ஆல்-அவுட்' ஆனது. இலங்கை சார்பில் அசிதா பெர்ணான்டோ, சோனல் தினுஷா தலா 3 விக்கெட் சாய்த்தனர்.

பின் முதல் இன்னிங்சை துவக்கிய இலங்கை அணிக்கு பதும் நிசங்கா, லஹிரு உதாரா கைகொடுத்தனர். முதல் விக்கெட்டுக்கு 88 ரன் சேர்த்த போது உதாரா (40) அவுட்டானார். அடுத்து வந்த தினேஷ் சண்டிமால் அரைசதம் கடந்தார். மறுமுனையில் அசத்திய பதும் நிசங்கா, டெஸ்ட் அரங்கில் தனது 4வது சதத்தை பதிவு செய்தார். இரண்டாவது விக்கெட்டுக்கு 194 ரன் சேர்த்த போது நயீம் ஹசன் பந்தில் சண்டிமால் (93) அவுட்டானார்.

இலங்கை அணி முதல் இன்னிங்சில் 290/2 ரன் எடுத்து, 43 ரன் முன்னிலை பெற்றிருந்த போது வெளிச்சமின்மையால் 2ம் நாள் ஆட்டம் முன்னதாகவே முடிவுக்கு வந்தது. நிசங்கா (146), பிரபாத் ஜெயசூர்யா (5) அவுட்டாகாமல் இருந்தனர்.