'டி-20' உலக கோப்பை வென்ற இந்திய அணியினருக்கு முன்னாள் ஜாம்பவான்கள் வாழ்த்து தெரிவித்தனர்.

தோனி: உலக சாம்பியன் பட்டம் வென்ற இந்திய அணியினருக்கு வாழ்த்துகள். எனது இதயதுடிப்பு அதிகரித்தது. இக்கட்டான சூழ்நிலையில் அமைதியாக இருந்து தன்னம்பிக்கையுடன் போராடி வெற்றி பெற்றது சிறப்பு. எனது பிறந்த நாள் பரிசாக, விலைமதிப்பற்ற பரிசு வழங்கியதற்கு நன்றி.

சச்சின்: வாழ்க்கை ஒரு வட்டம். 2007ல் வெஸ்ட் இண்டீஸ் மண்ணில் இழந்த உலக கோப்பையை, 2024ல் வெஸ்ட் இண்டீசில் பெற்றிருப்பது சிறப்பு. இந்த வெற்றியின் எனது நண்பர் டிராவிட் பங்களிப்பு மகத்தானது. ஒட்டுமொத்த அணியினருக்கும் வாழ்த்துகள்.

கவாஸ்கர்: நீண்ட நாட்களுக்கு பின் இந்தியாவுக்கு கிடைத்துள்ள மிகப் பெரிய வெற்றி. உலக கோப்பை வென்றது போட்டியில் சதம் விளாசுவதற்கு சமமானது. இதற்கு முன் நடந்த உலக கோப்பையில் அரையிறுதி, பைனல் வரை சென்ற இந்தியா, சதமடிக்க தவறியது. தற்போது சதம் விளாசியதால் கோப்பை வென்றது.

கங்குலி: ரோகித் சர்மா தலைமையிலான இந்திய அணியினருக்கு மனமார்ந்த வாழ்த்துகள். இன்னும் நிறைய கோப்பை வெல்வர். டிராவிட் தலைமையிலான பயிற்சியாளர் குழு, பும்ரா, கோலி, பாண்ட்யா உள்ளிட்ட அனைவரும் சிறப்பாக செயல்பட்டு நாட்டிற்கு பெருமை சேர்த்தனர்.

லட்சுமண், கும்ளே, காம்பிர் உள்ளிட்ட முன்னாள் வீரர்கள் இந்திய அணியினருக்கு தங்களது வாழ்த்துகளை தெரிவித்தனர்.