கராச்சி: 'டி-20' உலக கோப்பை தொடரில் பாகிஸ்தான் அணியின் வீழ்ச்சிக்கு, ஒற்றுமை இல்லாததே காரணம். வீரர்கள் மூன்று குழுக்களாக பிரிந்து செயல்பட்டுள்ளனர்.

அமெரிக்கா, வெஸ்ட் இண்டீசில் 'டி-20' உலக கோப்பை தொடர் நடக்கிறது. இதில் 'ஏ' பிரிவில் இடம் பெற்றிருந்த 'முன்னாள் சாம்பியன்' பாகிஸ்தான் அணி தடுமாறியது. அறிமுக அமெரிக்காவுக்கு எதிரான லீக் போட்டியில் 'சூப்பர் ஓவரில்' அதிர்ச்சி தோல்வி அடைந்தது. இந்தியாவுக்கு எதிராகவும் தோல்வியை சந்தித்தது. அமெரிக்கா-அயர்லாந்து இடையிலான போட்டி மழையால் ரத்தாக, பாகிஸ்தானின் 'சூப்பர்-8' கனவு தகர்ந்தது. லீக் சுற்றுடன் வெளியேறியது.

இது குறித்து பாகிஸ்தான் கிரிக்கெட் போர்டு (பி.சி.பி.,) நிர்வாகி ஒருவர் கூறியது:

பாகிஸ்தான் அணியில் ஒற்றுமை இல்லை. கேப்டன் பதவியை பறித்ததால், ஷாகீன் ஷா அப்ரிதி அதிருப்தியில் இருந்தார். இவருக்கு கேப்டன் பாபர் ஆசம் ஒத்துழைப்பு அளிக்கவில்லை. கேப்டன் பதவிக்கு தன்னை பரிசீலிக்காததால் முகமது ரிஸ்வானும் கோபத்தில் இருந்தார். பாபர் தலைமையில் ஒரு குழு, ஷாகீன் அப்ரிதியின் கீழ் மற்றொரு குழு, ரிஸ்வான் கட்டுப்பாட்டில் ஒரு குழு என மூன்று குழுக்களாக வீரர்கள் பிரிந்து செயல்பட்டனர்.

பாகிஸ்தானின் சொதப்பல் ஆட்டத்துக்கு கேப்டன் பாபரை மட்டும் குறை சொல்ல முடியாது. இக்கட்டான கட்டத்தில் முன்னணி வீரர்கள் கைகொடுக்கவில்லை. உதாரணமாக, அமெரிக்காவுக்கு எதிரான போட்டியில், கடைசி ஓவரில் 15 ரன்னை ஹாரிஸ் ராப் கட்டுப்படுத்த தவறினார். 'புல் டாஸ்' பந்துகளை வீசி பவுண்டரி, சிக்சர் அடிக்க வாய்ப்பு ஏற்படுத்தி தந்தார். உடற்தகுதி இல்லாத வீரர்களும் வெற்றிக்கு உதவவில்லை.

இவ்வாறு அவர் கூறினார்.