திருநெல்வேலி: டி.என்.பி.எல்., லீக் போட்டியில் அசத்திய சேப்பாக்கம் அணி 14 ரன் வித்தியாசத்தில் திருச்சி அணியை வீழ்த்தியது.

தமிழகத்தில் டி.என்.பி.எல்., 8வது சீசன் நடக்கிறது. திருநெல்வேலியில் நடந்த லீக் போட்டியில் சேப்பாக்கம், திருச்சி அணிகள் மோதின. 'டாஸ்' வென்ற திருச்சி அணி 'பீல்டிங்' தேர்வு செய்தது.

சேப்பாக்கம் அணிக்கு நாராயண் ஜெகதீசன்(51), சந்தோஷ் குமார்(56)ஜோடி சூப்பர் துவக்கம் கொடுத்தது. டேரில் பெராரியோ (30), பிரதோஷ் ரஞ்சன் பால் (29*), அபிஷேக் தன்வர் (26*) கைகொடுத்தனர். சேப்பாக்கம் அணி 20 ஓவரில் 4 விக்கெட்டுக்கு 198 ரன் எடுத்தது.

கடின இலக்கை விரட்டிய திருச்சி அணிக்கு வாசீம் அகமது (48) நல்ல துவக்கம் கொடுத்தார். ஸ்யாம் சுந்தர் (9), சஞ்சய் யாதவ் (1), அர்ஜுன் மூர்த்தி (5) சோபிக்கவில்லை. ராஜ்குமார் (39) நம்பிக்கை தந்தார். கடைசி ஓவரில் 31 ரன் தேவைப்பட்டன. அஸ்வின் கிறிஸ்ட் பந்துவீசினார். ஒரு சிக்சர், 2 பவுண்டரி உட்பட 16 ரன் மட்டும் கிடைத்தன.

திருச்சி அணி 20 ஓவரில் 184/7 ரன் எடுத்து தோல்வியடைந்தது. ஜாபர் ஜமால் (52), சரவண குமார் (6) அவுட்டாகாமல் இருந்தனர். சேப்பாக்கம் சார்பில் அஸ்வின் கிறிஸ்ட் 2 விக்கெட் வீழ்த்தினார்.