'பீப்' ஒலியால் திக்... திக்...

ஜிப்மர் கல்லுாரியில் கருத்தரங்கில் துணை ஜனாதிபதி பேசிக் கொண்டிருந்த போது, திடீரென அரங்கின் உள்ளே 'பீப்' சத்தம் கேட்டது. வலது பக்க படிக்கட்டு பகுதியில் இருந்து, இந்த சத்தம் சில நிமிடங்கள் ஒலித்துக் கொண்டே இருந்ததால் பரபரப்பு ஏற்பட்டது. உரையாற்றிக் கொண்டிருந்த துணை ஜனாதிபதி தன் பேச்சை நிறுத்தி, சத்தம் வந்த திசையை நோக்கி பார்வையை திருப்பினார். பதற்றமடைந்த பாதுகாவலர்கள், பீப் சத்தம் வந்த திசையை நோக்கி ஓடினர். சில நிமிடங்களில் பீப் ஒலி அடங்கி அமைதியானதும், துணை ஜனாதிபதி பேச துவங்கினார். 'ரொம்ப நேரம் பேசுகிறேனா; அதற்காகத் தான் இந்த சமிக்ஞையா' என, சிரித்தபடியே கேட்டார். இதனால் பதற்றம் தணிந்து, அரங்கத்தில் சிரிப்பலை எழுந்தது. விழா அரங்கில், தீ விபத்தை கண்டறிய புகை உணர் சென்சார் அமைக்கப்பட்டுள்ளது. அவசர உதவிக்கு மேனுவல் டைப் சுவிட்சும் உள்ளது. விழாவில் ஏற்றப்பட்ட குத்துவிளக்கில் இருந்து எழுந்த புகையால், தீ எச்சரிக்கைக்காக சமிக்ஞை வந்ததா அல்லது வேறு என்ன காரணம் என, விசாரணை நடக்கிறது.