செயல் தலைவர் பதவி யாருக்கு? ''கட்சியின் செயல் தலைவர் பதவி தொடர்ந்து இருக்கும். இனி, அதை யாருக்கு கொடுக்க வேண்டும் என்பதை, நான் முடிவு செய்வேன்,'' என்றார் ராமதாஸ். மாநில நிர்வாக குழு உறுப்பினராக உள்ள மூத்த மகள் ஸ்ரீ காந்திமதியை செயல் தலைவராக நியமிக்க, ராமதாஸ் முடிவு செய்துள்ளதாக தெரிகிறது. இது பற்றி கேள்வி வந்ததும், பேட்டியை ராமதாஸ் முடித்துக் கொண்டார்.

'மன்னிக்க தயார்!' ''அன்புமணியை சுற்றி இருப்பவர்கள், நான் வளர்த்த பிள்ளைகள் தான். அவரோடு இருந்தால் பல நன்மைகள் கிடைக்கும் என்று நினைக்கலாம். ஆனால், அவர்களும் கட்சி விரோத நடவடிக்கையில் ஈடுபட்டு, தனி கட்சியாக செயல்படுவது போன்ற தோற்றத்தை ஏற்படுத்தி வருகின்றனர். அவர்கள் மீது எனக்கு வருத்தம் இருந்தாலும், திருந்த வாய்ப்புள்ளது என்பதால், அவர்களை மன்னிக்க தயாராக இருக்கிறேன்,'' என்றார் ராமதாஸ்.

உளவு பார்த்திருந்தால் இப்படியொரு சூழல் வந்திருக்காது! பா.ம.க., செய்தி தொடர் பாளர் பாலு அளித்த பேட்டி: பா.ம.க., சட்ட விதிகளின்படி, கட்சியின் நிறுவனருக்கு, நிர்வாகிகளை நீக்குவது, கூட்டங்களை நடத்துவது போன்ற நிர்வாகப் பணிகளை மேற்கொள்ளும் அதிகாரம், வழங்கப்படவில்லை. நிர்வாகிகளை நீக்குவது, செயற்குழு மற்றும் பொதுக்குழு கூட்டுவது போன்ற எந்த முடிவையும் எடுக்கும் அதிகாரம், பொதுக்குழுவால் தேர்ந்தெடுக்கப்பட்ட கட்சித் தலைவருக்கு மட்டுமே உள்ளது. எனவே, அன்புமணியை பா.ம.க.,லிருந்து நீக்கி, ராமதாஸ் வெளியிட்ட அறிவிப்பு, கட்சி விதிகளுக்கு எதிரானது; எவ்விதத்திலும் அன்புமணியை கட்டுப்படுத்தாது. பா.ம.க., தலைவராக அன்புமணியே தொடர்கிறார். கடந்த ஆக., 9ல், மாமல்லபுரத்தில் அன்புமணி தலைமையில் பா.ம.க., பொதுக்குழு நடந்தது. அதில், 'சட்டசபை தேர்தல் வருவதால், கட்சியின் அமைப்பு தேர்தலை நடத்தும் சூழல் இல்லை. எனவே, தலைவர், பொதுச்செயலர், பொருளாளர் பதவிக்காலத்தை, வரும் 2026 ஆகஸ்ட் வரை ஓராண்டு நீட்டித்து' தீர்மானம் நிறைவேற்றப்பட்டது. இதை, ஆகஸ்ட் 10ல் தேர்தல் கமிஷனில் தெரிவித்தோம்; அதை தேர்தல் கமிஷன் ஏற்றது. அதற்கான உத்தரவு எங்களுக்கு வழங்கப்பட்டுள்ளது. அதன்படி, பா.ம.க., தலைவராக அன்புமணி, பொதுச்செயலராக வடிவேல் ராவணன், பொருளாளராக திலகபாமா தொடர்கின்றனர். எனவே, கட்சி அமைப்பு விதிகளின்படியும், தேர்தல் கமிஷன் சமீபத்தில் வழங்கிய அங்கீகார உத்தரவின்படியும், அன்புமணியை நீக்கிய ராமதாஸ் அறிவிப்பு செல்லாது. சட்டசபை தேர்தலில் கூட்டணி அமைப்பது, வேட்பாளர் தேர்வு போன்ற அதிகாரம் அன்புமணியிடமே உள்ளது. உளவு பார்க்கும் பழக்கம் அவரிடம் கிடையாது. அப்படி அவர் உளவு பார்த்திருந்தால், இப்படியொரு சூழல் வந்திருக்காது. இப்போதுள்ள குழப்பமான சூழ்நிலையை அமைதியாக, நிதானமாக கையாண்டு வருகிறோம். எதிர்காலத்தில் என்ன நடக்கும் என்பதை யாரும் கணிக்க முடியாது. இவ்வாறு அவர் கூறினார். இதே கருத்தை அன்புமணியும் வலியுறுத்தி உள்ளார்.