காக்கா முட்டை என்னை உயர்த்தியது - ஐஸ்வர்யா ராஜேஷ்

இயக்குனர் வெற்றிமாறன், நடிகர் தனுஷ் தயாரிப்பில், மணிகண்டன் இயக்கத்தில், ஐஸ்வர்யா ராஜேஷ், சிறுவர்கள் விக்னேஷ், ரமேஷ் மற்றும் பலர் நடித்த படமான "காக்கா முட்டை" படம் வெளிவந்து இன்றுடன் ஆறு வருடங்கள் நிறைவடைந்துள்ளது.

2015ம் ஆண்டிற்கான சிறந்த குழந்தைகள் திரைப்படமாகத் தேர்வு, படத்தில் நடித்த விக்னேஷ், ரமேஷ் இருவரும் சிறந்த குழந்தை நட்சத்திரங்களாகத் தேர்வு என இரண்டு தேசிய விருதுகளைப் பெற்ற படம். தமிழ் சினிமாவின் முக்கிய படங்களில் ஒன்றாக விமர்சகர்களாலும் ரசிகர்களாலும் பெரிதும் பாராட்டப்பட்ட படம்.

இப்படத்தைப் பற்றி நினைவு கூர்ந்துள்ள ஐஸ்வர்யா ராஜேஷ், “நாட்கள் எப்படி நகர்கின்றன. ஆறு ஆண்டுகளுக்கு முன்பாக இன்றைய தினத்தில் வெளிவந்த படம் "காக்கா முட்டை". எப்போதும் எனது இதயத்திற்கு நெருக்கமான முக்கியமான படம். பல தடைகளை உடைத்து, எனது வாழ்க்கையில் என்னை உயர்த்திய படம். இயக்குனர் மணிகண்டன், தயாரிப்பாளர்கள் தனுஷ், வெற்றிமாறன் சார் ஆகியோருக்கு மகத்தான நன்றி,” எனக் குறிப்பிட்டுள்ளார்.