தலைமை நீதிபதி மறுப்பு!

சிலை புனரமைப்பு வழக்கு தொடர்பாக கூறிய கருத்துகள் சர்ச்சையை ஏற்படுத்திய நிலையில், உச்ச நீதிமன்ற தலைமை நீதிபதி பி.ஆர்.கவாய் விளக்கம் அளித்துள்ளார். இது குறித்து அவர் கூறுகையில், ''எந்த மதத்தின் மீதும் துவேஷம் இல்லை; அனைத்து மதத்தையும் நான் மதித்து நடப்பவன். எனது கருத்துகள் சமூக வலைதளங்களில் தவறாக சித்தரிக்கப்பட்டுள்ளது,'' என்றார். உச்ச நீதிமன்ற தலைமை நீதிபதிக்கு ஆதரவாக பேசியுள்ள மூத்த வழக்கறிஞர் கபில் சிபில், ''19 ஆண்டுகளாக தலைமை நீதிபதி கவாய் பற்றி அறிவேன். அவர் அனைத்து மதத்தினரையும் மதிப்பவர். சமூக ஊடகங்களில் அவரது கருத்து பூதாகரமாக்கப்பட்டு விட்டது. கண்மூடித்தனமாக ஓடும் குதிரையை போல சமூக வலைதளம் மாறிவிட்டது. அதற்கு கடிவாளம் போடுவது என்பது இயலாத காரியம்,'' என்றார். சொலிசிட்டர் ஜெனரல் துஷார் மேத்தாவும், உச்ச நீதிமன்ற தலைமை நீதிபதி கவாய்க்கு ஆதரவாக விளக்கம் அளித்துள்ளார்.