பகுஜன் சமாஜ் தனித்து போட்டி

பீஹார் சட்டசபை தேர்தலில் தனித்து போட்டியிட பகுஜன் சமாஜ் கட்சி முடிவு செய்துள்ளது. இது தொடர்பாக, கட்சியின் மூத்த நிர்வாகிகளுடன் பகுஜன் சமாஜ் கட்சி தலைவர் மாயாவதி இரு தினங்களாக ஆலோசனை நடத்தினார். பின், இது குறித்து தன் சமூக வலைதள பக்கத்தில் அவர், 'பீஹாரில் அடுத்த சில மாதங்களில் நடக்கவுள்ள சட்டசபை தேர்தலில் பகுஜன் சமாஜ் தனித்து போட்டியிடும். 'வேட்பாளர்களை தேர்வு செய்வது குறித்து மூத்த நிர்வாகிகளுடன் ஆலோசனை நடத்தப்பட்டது. அடுத்த மாதம், துவக்கத்தில், தேர்தல் பிரசாரங்களை துவக்க முடிவு செய்யப்பட்டுள்ளது. பீஹார் தொகுதிகளை மூன்று மண்டலங்களாக பிரித்து, ஒவ்வொன்றிற்கும் தனித்தனி பொறுப்பாளராக கட்சி நிர்வாகிகள் அறிவிக்கப்பட்டுள்ளனர்' என, தெரிவித்துள்ளார்.