வயநாடு: கேரளாவின் வயநாட்டில் ஏற்பட்ட நிலச்சரிவு மீட்பு பணிகளில் மாநில அரசுக்கு மத்திய அரசு உதவ வேண்டும் என லோக்சபாவில் காங்கிரஸ் எம்.பி., ராகுல் வலியுறுத்தினார்.

கேரளா மாநிலம் வயநாடு மாவட்டத்தின் 3 பகுதிகளில் ஏற்பட்ட நிலச்சரிவு தொடர்பாக லோக்சபாவில் எதிர்க்கட்சி தலைவரும், காங்கிரஸ் எம்.பி.,யுமான ராகுல் பேசியதாவது: வயநாடு நிலச்சரிவு பகுதிகளில் மீட்பு பணிகளில் மாநில அரசுக்கு மத்திய அரசு உதவ வேண்டும். போக்குவரத்து மற்றும் தொலைத்தொடர்பு ஆகியவற்றை உடனடியாக மீட்டு மக்களுக்கு வழங்க வேண்டும். பாதிக்கப்பட்ட குடும்பங்களுக்கான மறு குடியமர்வு திட்டங்களை உடனடியாக மேற்கொள்ள வேண்டும்.

இதற்கு பதிலளித்து பேசிய மத்திய அமைச்சர் கிரண் ரிஜிஜூ, ''வயநாடு நிலச்சரிவில் பாதிக்கப்பட்டோருக்கு அனைத்து உதவிகளும் வழங்கப்படும். மீட்பு பணிகள் துரிதப்படுத்தப்பட்டுள்ளன'' என்றார்.