கேரளாவில் பாதிப்பு

தென்மேற்கு பருவமழை தீவிரமடைந்துள்ளதை அடுத்து, கேரளா முழுதும் பரவலாக கனமழை பெய்து வருகிறது. கோழிக்கோடு, கண்ணுார் மாவட்டங்களில் உள்ள நீர்நிலைகளும் நிறைந்ததால், குடியிருப்பு பகுதிகளில் மழைநீர் சூழ்ந்தது. தகவலறிந்து வந்த மீட்புக்குழுவினர், அங்கு சிக்கி தவித்த மக்களை மீட்டு, நிவாரண முகாம்களில் தங்க வைத்தனர்.தொடர் மழையால் சாலையோர மரங்கள் முறிந்து விழுந்ததால், பெரும்பாலான சாலைகள் துண்டிக்கப்பட்டு உள்ளன. ஏராளமான மின் கம்பங்கள் சாய்ந்ததால், முன்னெச்சரிக்கை நடவடிக்கையாக பல பகுதிகளில் மின்சாரம் துண்டிக்கப்பட்டது. இதனால், பொதுமக்களின் இயல்பு வாழ்க்கை கடுமையாக பாதிக்கப்பட்டது.