புதுடில்லி : பிரதமர் நரேந்திர மோடி தலைமையிலான மூன்றாவது ஆட்சியில், தங்களுக்கு தனிப்பொறுப்புடன் இணையமைச்சர் பதவி வழங்கப்பட்டது முறையானதல்ல என்பதால் நிராகரித்ததாக, தேசியவாத காங்கிரஸ் தலைவர் அஜித் பவார் குறிப்பிட்டார்.

பிரதமர் மோடி தலைமையில், தேசிய ஜனநாயகக் கூட்டணி அரசு நேற்று முன்தினம் பதவியேற்றது. இதில், கூட்டணி கட்சிகளுக்கு, 11 அமைச்சர் பதவிகள் அளிக்கப்பட்டன.

மஹாராஷ்டிராவில் கூட்டணி அரசில் இடம்பெற்றுள்ள, தேசியவாத காங்கிரஸ் கட்சிக்கு, தனிப்பொறுப்புடன் இணையமைச்சர் பதவி வழங்க, பா.ஜ., முன் வந்தது. ஆனால், அதை தேசியவாத காங்., நிராகரித்தது.

இது கூட்டணிக்குள் சலசலப்பை ஏற்படுத்தியுள்ளது. மேலும், எதிர்க்கட்சிகளும் விமர்சனத்தை துவக்கியுள்ளன.

காத்திருப்போம்

இந்நிலையில், தேசியவாத காங்., தலைவர் அஜித் பவார் கூறியுள்ளதாவது:

எங்கள் கட்சியைச் சேர்ந்த பிரபுல் படேலுக்கு, மோடி அரசில் தனிப்பொறுப்புடன் இணையமைச்சர் பதவி தருவதாக கூறினர். அவர், பிரதமர் மன்மோகன் சிங் அமைச்சரவையில், கேபினட் அமைச்சராக இருந்தவர். அதனால், இணையமைச்சர் பொறுப்பை ஏற்பது சரியானதாக இருக்காது.

இதை பா.ஜ.,வுக்கும் தெரிவித்தோம். தற்போதைக்கு நாங்கள் பதவியேற்கவில்லை. சில நாட்கள் காத்திருக்கத் தயார் என்றும் கூறினோம்.

மற்றபடி இதனால், கூட்டணிக்குள்ளேயோ, மஹாராஷ்டிரா அரசிலோ எந்தக் குழப்பமும் இல்லை. நாங்கள் கூட்டணியில் தொடர்கிறோம்.

இவ்வாறு அவர் கூறினார்.

ஆச்சரியம் இல்லை

இது குறித்து தேசியவாத காங்கிரஸ் -- சரத் சந்திர பவார் பிரிவின் எம்.பி., சுப்ரியா சுலே கூறியுள்ளதாவது:

காங்கிரஸ் தலைமையிலான ஐக்கிய முற்போக்கு கூட்டணியில், பிளவுபடாத தேசியவாத காங்கிரசுக்கு உரிய மரியாதை வழங்கப்பட்டது.

எத்தனை எம்.பி.,க்கள் வைத்திருக்கிறீர்கள் என்ற கணக்கை பார்க்காமல், கூட்டணி கட்சிகளை நட்பு கட்சிகளாக கருதி, உரிய மரியாதை கொடுத்தனர்.

கடந்த, 10 ஆண்டுகளாக, பா.ஜ.,வை நாம் பார்த்து வருகிறோம். கூட்டணி கட்சிகளுக்கு அவர்கள் எவ்வளவு மரியாதை கொடுக்கின்றனர், எப்படி நடத்துகின்றனர் என்பதை பார்த்து வருகிறோம். அதனால், இதில் ஆச்சரியம் எதுவும் இல்லை.

இவ்வாறு அவர் கூறினார்.