பிளாஷ்பேக் : காணாமல் போன நல்லவள்

1991ம் ஆண்டு ரஜினி நடிப்பில் வெளியாகி இருந்த படம் "நாட்டுக்கொரு நல்லவன்". கன்னட நடிகர் ரவிச்சந்திரன் தயாரித்து, நடித்திருந்தார். ஜூகி சால்வா, குஷ்பு உள்ளிட்ட பலர் நடித்திருந்தனர். இது ஒரு பான் இந்தியா படமாக வெளியான பக்கா கமர்ஷியல் படம்.

இதேப்போன்று 1959ம் ஆண்டு வெளியான படம் "நாட்டுக்கொரு நல்லவள்". இதனை தெலுங்கு இயக்குநர் தாசரத் ராமய்யா இயக்கினார். எஸ்.எஸ்.ராஜேந்திரன், விஜயகுமாரி, டி.எஸ்.பாலய்யா, பண்டரிபாய், சகஸ்ரநாமம் உள்ளிட்ட பலர் நடித்தனர். சி.டி.ராஜகாந்தம் வில்லியாக நடித்திருந்தார். ஆத்மநாதன் இசை அமைத்திருந்தார், மெஜஸ்டிக் பிக்சர்ஸ் சார்பில் ஆர்.சுப்பையா தயாரித்திருந்தார்.

ரஜினி நடித்த படம் ஒரு காவல்துறை அதிகாரி நாட்டுக்கொரு நல்லவனாகிற கதை. இந்த படம் ஒரு குடும்பத் தலைவி வீட்டுக்கும், நாட்டுக்கும் நல்லவளாகிற கதை. இந்த படத்தின் பிரதிகள் காலப்போக்கில் அழிந்து விட்டது. படத்தின் பாடல்கள் மட்டுமே தற்போது கேட்க கிடைக்கிறது.