சென்னை:தமிழகத்தில் இம்மாதம் வணிக சிலிண்டர் விலை, 70.50 ரூபாய் குறைந்துள்ளது.

இந்தியன் ஆயில், பாரத் பெட்ரோலியம், ஹிந்துஸ்தான் பெட்ரோலியம் ஆகிய பொதுத்துறை எண்ணெய் நிறுவனங்கள் வீடுகளுக்கு, 14.20 கிலோ எடையில், சமையல் காஸ் சிலிண்டரை வினியோகம் செய்கின்றன. ஹோட்டல் உள்ளிட்ட வணிக பயன்பாட்டிற்கு, 19 கிலோ எடையில் விற்கப்படுகிறது.

எண்ணெய் நிறுவனங்கள், சர்வதேச சந்தையில் நிலவும் கச்சா எண்ணெய் விலைக்கு ஏற்ப, உள்நாட்டில் மாதத்தின் முதல் நாளன்று, சமையல் காஸ் சிலிண்டர் விலையில் மாற்றம் செய்கின்றன.

தமிழகத்தில் கடந்த மாதம் வீட்டு சிலிண்டர், 818.50 ரூபாய்க்கு விற்கப்பட்டது. இம்மாதம் அதன் விலை மாற்றப்படாமல், 818.50 ரூபாயாகவே நிர்ணயம் செய்யப்பட்டுள்ளது. மே மாதம், வணிக பயன்பாட்டிற்கான சிலிண்டர், 1,911 ரூபாய்க்கு விற்கப்பட்டது. இம்மாதம் அதன் விலை, 70.50 ரூபாய் குறைக்கப்பட்டு, 1,840.50 ரூபாயாக நிர்ணயம் செய்யப்பட்டு உள்ளது.