ஆடம்பர செலவு குறைத்தல் : சொன்னதைச் செய்த கமல்ஹாசன்

இந்தியத் திரையுலகம் தற்போது மோசமான சூழலில் நகர்ந்து கொண்டிருக்கிறது. திரைப்படத் தயாரிப்புகளுக்கான செலவுகள் கடுமையாக உயர்ந்துள்ளன. அதற்காக கிடைக்க வேண்டிய தியேட்டர் வருவாய் மிகவும் குறைந்து வருகிறது.

இந்நிலையில் சில தினங்களுக்கு முன்பு ஒன்றிணைந்து பேசுவோம் வாருங்கள் என கமல்ஹாசன் அறிக்கை ஒன்றை வெளியிட்டிருந்தார். அதில் பல்வேறு விஷயங்களைக் குறிப்பிட்டிருந்தார்.

அவற்றில், “தேவையற்ற விரயம், ஆடம்பரம் மற்றும் பரிவார செலவுகளைக் குறைத்தல்,” ஆகியவற்றைக் குறிப்பிட்டிருந்தார்.

அவற்றை அடுத்த சில நாட்களிலேயே அவர் பின்பற்றி நடந்திருக்கிறார். நேற்று ஹைதராபாத்திற்கு படப்பிடிப்புக்காகச் சென்ற அவர் பயணிகள் விமானத்தில் பயணித்திருக்கிறார். கடந்த சில வருடங்களாக தனி விமானத்தில் பயணித்த அவர் தற்போது செலவுகளைக் குறைக்கும் விதத்தில் அதை மாற்றிக் கொண்டிருக்கிறார்.

சொன்னதோடு அதைச் செயலிலும் காட்டியுள்ள கமல்ஹாசனுக்கு சமூக வலைதளங்களில் ரசிகர்கள் பாராட்டி வருகிறார்கள்.