கலெக்டர் உமாநாத் அறிக்கை:

சிறந்த விளையாட்டு வீரர்களை உருவாக்கிய சாதனைக்காக உரிய ஆவணங்கள் பெற்றுள்ள இரு பயிற்சியாளர்கள், இரு உடற்கல்வி இயக்குனர்கள், ஒரு உடற்கல்வி ஆசிரியர், ஒரு உடற்கல்வி ஆசிரியைக்கு முதலமைச்சர் விருது நிறுவப்பட்டுள்ளது.

இத்திட்டத்தில், ஒவ்வொரு தனி நபரும் ஒரு லட்சம் ரூபாய் ரொக்க பரிசும், தகுதியுரையும் வழங்கி சிறப்பிக்கப்படுவர்.

2010-11ம் ஆண்டுக்கான மேற்கூறிய விருதுகள் வழங்க, பயிற்றுனர்கள் (தமிழ்நாடு விளையாட்டு மேம்பாட்டு ஆணையம், இந்திய விளையாட்டுக் குழுமம் மற்றும் இதர பயிற்றுனர்கள்) மற்றும் பள்ளிகளின் உடற்கல்வி இயக்குனர்கள் மற்றும் உடற்கல்வி ஆசிரியர்கள் விண்ணப்பிக்கலாம்.

விண்ணப்பதாரர் ஐந்து ஆண்டுகளாக தமிழகத்தில் வசிப்பவராக இருக்க வேண்டும்.

2010 - 11 விருது ஆண்டுக்கு முந்தைய ஐந்து ஆண்டுகள் தொடர்ந்து தேசிய மற்றும் சர்வதேச அளவில் விளையாட்டு வீரர்களை உருவாக்கிய ஆவணங்களை பெற்றவராகவும் இருக்க வேண்டும்.

2007ம் ஆண்டு ஏப்., 1ம் தேதி முதல் 2010 மார்ச் 31ம் தேதி வரை, தொடர்ந்து மூன்று ஆண்டுகள் நிலையான செயலாக்கம் மட்டுமே விருதுக்கு கருத்தில் எடுத்துக் கொள்ளப்படும்.

உடற்கல்வி இயக்குனர்கள் மற்றும் உடற்கல்வி ஆசிரியர்கள் விண்ணப் பங்களை முதன்மைக் கல்வி அலுவலரின் பரிந்துரையுடன் தமது நிறுவன தலைமையின் மூலமாக தமிழ்நாடு விளையாட்டு மேம்பாட்டு ஆணைய உறுப்பினர், செயலர் அவர்களுக்கு அனுப்பி வைக்க வேண்டும்.

இவ்விருதுக்கான விண்ணப்ப படிவங்கள் மற்றும் வழிகாட்டு நெறிமுறைகளை www.sportsinfotn.com  என்ற இணையதள முகவரியில் பதிவிறக்கம் செய்து கொள்ளலாம்.