இந்த ஊரின் அருகில் உள்ள தியானபுரம் என்ற இடத்தின் வழியே காஸ் லைன் செல்கிறது.இந்த காஸ் லைன் மீது நேற்றிரவு 7.30 மணியளவில் அவ்வழியே அரிசி லோடுடன் வந்த லாரி எதிர்பாராத விதமாக உரசியது. இதனால், காஸ் லைன் திடீரென தீப்பற்றி எரிய ஆரம்பித்தது.இதனால் அதிர்ச்சியடைந்த சுற்றுப்பகுதிகளில் உள்ள பொதுமக்கள் தங்களது வீட்டை காலி செய்துவிட்டு ஒரு கிலோ மீட்டருக்கு அப்பால் சென்றுவிட்டனர்.தீ விபத்தை அறிந்த திருவாரூர் தீயணைப்பு நிலைய அதிகாரிகள் விரைந்து சென்று, தீயை அணைக்கும் முயற்சியில் ஈடுபட்டும் பலனில்லை. உடனடியாக சுற்றுப்பகுதிகளிலிருந்து பல்வேறு தீயணைப்பு வாகனங்கள் வரவழைக்கப்பட்டு தீயை அணைக்கும் பணி நடந்துவருகிறது.திருவாரூர் மாவட்ட போலீஸ் எஸ்.பி., தினகரன் உள்ளிட்ட அதிகாரிகள் தீயை அணைக்கும் முயற்சியிலும், அப்பகுதியில் பாதுகாப்பு ஏற்பாடுகளையும் நேரில் செய்து வருகின்றனர்.நேற்றிரவு 7.30 மணி முதல் தொடர்ந்து காஸ்லைன் எரிந்து வருவதால் திருவாரூர் மாவட்டம் முழுவதும் பரபரப்பு நிலவி வருகிறது.