ஈரோடு :ஈரோடு மாநகராட்சி மேயர் தேர்தலில் இரு பெண்கள் போட்டியிட்டாலும், உண்மையான போட்டி அமைச்சர் ராமலிங்கத்துக்கும், முன்னாள் அமைச்சர் ராஜாவுக்கும் இடையேதான் நடக்கிறது.

அ.தி.மு.க.,வைப் போல், தி.மு.க.,விலும் மேயர் சீட் கேட்டு, சிட்டிங் மேயர் குமார் முருகேஷ், முன்னாள் யூனியன் தலைவர் சிவக்குமார், மாவட்ட பொருளாளர் செந்தில், காசிபாளையம் நகராட்சி தலைவர் சுப்பிரமணியம் ஆகியோர் விண்ணப்பித்திருந்தனர். இவர்களில், மாவட்ட செயலாளரும், முன்னாள் அமைச்சருமான ராஜாவின் ஆதரவாளர் செல்லப்பொன்னிக்கு சீட் கிடைத்துள்ளது.

காசிபாளையம் நகராட்சி தலைவர் சுப்பிரமணியம் கூறுகையில், ''நானும், மேலும் பலரும் மேயர் 'சீட்' கேட்டு கட்சியில் விருப்ப மனு அளித்தோம். மாவட்டத் துணைச் செயலாளர் செல்லப்பொன்னியை வேட்பளராக, கட்சி தலைமை அறிவித்துள்ளது. அவருக்கு வாய்ப்பு கிடைத்ததை; எனக்கு கிடைத்தாகவே கருதுகிறேன். இதே மனநிலையில்தான் 'சீட்' கிடைக்காத அனைவரும் உள்ளனர்,'' என்றார். இரு கட்சிகளும் கோஷ்டி பூசல்கள் ஏதுமில்லை என்பதை காட்டிக் கொள்ள, சோற்றுக்குள் பூசணிக்காயை மூடி மறைக்க முயல்கின்றன. அதேவேளை, மல்லிகாவை வெற்றி பெற வைக்க வேண்டிய கட்டாயத்தில் அமைச்சர் ராமலிங்கமும், செல்லப்பொன்னியை மேயராக்க வேண்டிய நிலையில் ராஜாவும் உள்ளனர். அவ்வாறு நடக்கவில்லையெனில், தங்கள் பதவிக்கு ஆபத்து என்பதை இருவரும் உணர்ந்துள்ளனர்.