மன்னார்வளைகுடா உயிர்கோள காப்பகத்தில் 3,600க்கும் மேற்பட்ட கடல்வாழ் உயிரினங்கள் வாழ்கின்றன. இவை இலங்கை கடல் பகுதியிலும் உள்ளன. அங்கும் இவை வேட்டையாடப்படுகின்றன. இவற்றை பாதுகாக்க இலங்கை அரசு, தற்போது முன்வந்துள்ளது. அதன் ஒரு பகுதியாக இந்தியா-இலங்கை ஐ.ஏ.எஸ்., அதிகாரிகள், விஞ்ஞானிகள், சமூக ஆர்வலர்கள் பங்கேற்ற ஆலோசனை கூட்டம் ராமேஸ்வரத்தில் நடந்தது. இது குறித்து அதிகாரி ஒருவர் கூறியதாவது: மன்னார்வளைகுடா உயிர்கோள காப்பகம் போன்று, இலங்கையிலும் ஏற்படுத்த அந்நாட்டு அதிகாரிகள் ஆய்வு நடத்தினர். அவ்வாறு அமைக்கும் பட்சத்தில், அரிய வகை உயிரினங்கள் இலங்கை வழியாக கடத்தப்படுவது தடுக்கப்படும். இது தொடர்பாக இருநாட்டு அதிகாரிகள் கூட்டம், இலங்கையில் டிசம்பரில் நடக்கிறது, என்றார்.