இஸ்லாமாபாத் : கடந்த 2009ல் பாகிஸ்தானில் நடந்த இலங்கை கிரிக்கெட் அணியினர் மீதான தாக்குதலில், குற்றம் சாட்டப்பட்ட மூவரை பாகிஸ்தான் கோர்ட் ஜாமினில் விடுவித்துள்ளது.

பாகிஸ்தானின் பஞ்சாப் மாகாண தலைநகர் லாகூரில் உள்ள, பயங்கரவாத தடுப்பு சிறப்பு கோர்ட்டில் இதுகுறித்த விசாரணை நடந்து வந்தது. மாலிக் ஈசாக் மீதான குற்றச்சாட்டுகள் நிரூபிக்கப்படாததால், லாகூரின் கோட் லக்பத் சிறையில் அடைக்கப்பட்டிருந்த அவர், நேற்று முன்தினம் ஜாமினில் விடுவிக்கப்பட்டார். இதையடுத்து, நேற்று மேலும் மூவர் விடுவிக்கப்பட்டனர். இவர்கள் தலா, ஒரு லட்ச ரூபாய் பிணையத் தொகையில் ஜாமினில் விடுவிக்கப்பட்டுள்ளனர். இதற்கிடையில், சிறையில் மாலிக் ஈசாக் இருந்தபோது, மாகாண அரசிடம் இருந்து நிதியுதவி பெற்றதாக பாகிஸ்தானிலிருந்து வெளிவரும், 'தி எக்ஸ்பிரஸ் டிரிபியூன்' பத்திரிகை கூறியுள்ளது.

சிபா -இ- சஹாபா பயங்கரவாத அமைப்போடு தொடர்பில் இருந்ததாக விமர்சிக்கப்பட்ட பஞ்சாப் மாகாண சட்ட அமைச்சர் ராணா சனாவுல்லா, கோர்ட் உத்தரவுப்படி மாதந்தோறும் ஈசாக்கின் குடும்பத்திற்கு அரசால் நிதியுதவி வழங்கப்பட்டதாக தெரிவித்துள்ளார். ஆனால், 'கோர்ட் அவ்வாறு எந்த உத்தரவும் பிறப்பிக்கவில்லை. பஞ்சாபில், நவாஸ் ஷெரீபின் பாக்., முஸ்லிம் லீக் ஆட்சிக்கு வந்த பின் தான் இந்த நிதியுதவி வழங்கப் பெற்றது. பர்வேஸ் முஷாரப் அதிபராக இருந்த வரை இதுபோல் நடக்கவில்லை' என, 'டிரிபியூன் பத்திரிகை' கூறியுள்ளது. பல்வேறு பயங்கரவாத சம்பவங்கள், தாக்குதல்கள் என, மொத்தம் 44 வழக்குகளில் ஈசாக் மீது குற்றம் சாட்டப்பட்டுள்ளது. அவர், கடந்த 14 ஆண்டுகளாக சிறையில் இருந்தார் என்பது குறிப்பிடத்தக்கது.