சென்னை, கொரட்டூர் ஜெகதாம்பிகை நகர், யாதவாள் தெரு, பொன்னியம்மன் கோவில் தெரு மற்றும் தணிகாசலம் தெரு ஆகிய பகுதிகளில் வசிப்பவர்கள் நாகராஜ், 30, உதயகுமார், 20, ராஜன், 32, குணசேகர், 35, கேசவன், 30, மற்றும் செல்வராஜ், 28. இவர்கள், நேற்று முன்தினம் இரவு, தங்களுக்குச் சொந்தமான டூவீலர்களை, வீடுகளுக்கு முன் நிறுத்தியிருந்தனர். நேற்று அதிகாலை, அவர்கள் வெளியில் வந்து பார்த்த போது, நான்கு டூவீலர்கள் முழுவதுமாக எரிந்து கிடந்தன. இரு டூவீலர்களுக்கு லேசான சேதம் ஏற்பட்டிருந்தது. இது பற்றி கொரட்டூர் போலீஸ் நிலையத்தில் புகார் செய்தனர். நள்ளிரவு 1 மணிக்கு மேல், மேற்கண்ட பகுதிகளில் வலம் வந்த மர்ம நபர்கள் டூவீலர்களை எரித்துள்ளனர். தொழில் போட்டி, முன்விரோதம் காரணமாக எரித்தார்களா என்று, போலீசார் விசாரணை மேற்கொண்டுள்ளனர். கடந்த ஆறேழு மாதங்களுக்கு முன், கொரட்டூர் பகுதியில், ஒரு கார் மற்றும் இரண்டு டூவீலர்களும், திருமுல்லைவாயலில் ஒரு டூவீலரும், மர்மமான முறையில் எரிந்தது குறிப்பிடத்தக்கது.