குகைக்குள் டிரெக்கிங் செய்ய ரெடியா? ஒடிசா அரசு அறிமுகம்

ஒடிசாவின் சம்பல்பூர் மாவட்டத்தில் மஹாநதி கரையோரம் 350 சதுர கி.மீ., பரப்பில் டெப்ரிகர் சரணாலயம் உள்ளது. இதனருகே ஹிராகுடா அணையும் வனத்துறை பராமரிப்பில் உள்ளது.

இங்கிருந்து 2 மணி நேரம் பயணித்தால் பழங்கால குகைகள் உள்ள பீமா மண்டலி பகுதி வரும். இவை 30,000 ஆண்டுகள் பழமையானவை என தொல்லியல் துறையினர் உறுதிப்படுத்தியுள்ளனர்.

இந்த குகைகளில் மான், யானை ஆகிய விலங்குகளின் சிற்பங்கள், பல்வேறு விலங்குகளின் கால் தடங்கள், தேன்கூடு வடிவங்கள் ஆகியவை சித்தரிக்கப்பட்டுள்ளன.

இவற்றை சுற்றுலா பயணியர் சிரமமின்றி பார்வையிட புதிய சுற்றுலா திட்டத்தை மாநில அரசு அறிமுகப்படுத்தியுள்ளது.

டெப்ரிகர் சரணாலயம் துவங்கி பீமா மண்டலி குகைகள் வரை இது ஒரு நாள் பயண திட்டமாகும்.

இதில் ஹிராகுடா அணை, சமலேஸ்வரி கோவில், சம்பல்பூர் உயிரியல் பூங்கா ஆகியவற்றை காணலாம்.

இயற்கையை ரசிப்பதுடன், 1 கி.மீ., குகைகளுக்கு உள்ளேயும், வெளியேயும் டிரெக்கிங் செய்யலாம்.