சிறு வயது உடல் பருமனை தவிர்ப்பது எப்படி?

இன்றைய பரபரப்பான உலகில் பெரும்பாலான குழந்தைகள் சந்திக்கும் பிரச்னையாக உடல் பருமன் உள்ளது.

மரபியல் காரணிகள், உணவின் அளவு, பெற்றோரின் கவனிப்பின்மை, உடற்பயிற்சியின்மை உட்பட பல்வேறு காரணங்களால் உடல் பருமன் ஏற்படுவதாக டாக்டர்கள் கூறுகின்றனர்.

உயரத்திற்கு ஏற்ப உடல் எடை இருக்க வேண்டும். உயரத்தைவிட உடலின் எடை அதிகமாக இருந்தால் அதுவே 'ஒபிசிட்டி' எனப்படுகிறது.

சிறு குழந்தைகளாக இருந்தபோது மேற்கொண்ட உடற்பயிற்சி மற்றும் விளையாட்டுகள் வளர்ந்த பிறகு தொடர்வதில்லை.

இதுதவிர, டிவி, ஸ்மார்ட்போன், வீடியோ கேம்ஸ் என வீட்டிற்குள்ளேயே அடைந்து இருப்பதும், உடல்பருமனுக்கு காரணமாக அமைகிறது.

அதிகரிக்கும் உடற்பருமனானது, அவர்களின் மேற்படிப்பு, பணி, என எதிர்காலத்திலும் பிரச்னைகளைக் தரக்கூடும். மேலும், இதர உடல் சம்பந்தப்பட்ட பிரச்னைகளும் வர வாய்ப்புள்ளது.

எனவே, குழந்தைகளின் உடல் எடை அதிகமாகிறது என தெரிந்தால் முறையான உணவுப் பழக்கம், சரியான நேரத்தில் உண்பது உள்ளிட்ட வழிமுறைகளை பின்பற்ற வேண்டும்.

உடற்பயிற்சி செய்தல், தன் வயது பிள்ளைகளுடன் சேர்ந்து விளையாடுதல் ஆகியவற்றை பெற்றோர்கள் ஊக்கப்படுத்த வேண்டும்.

உடல் எடையைக் குறைக்க மருத்துவ சிகிச்சை மட்டுமே ஒரே தீர்வு என்றெண்ணி, முறையற்ற மற்றும் போலி மருத்துவம் போன்றவற்றை கண்மூடித்தனமாகப் பின்பற்றுவதை தவிர்க்க வேண்டும்.

ஆரோக்கியமான மற்றும் சமச்சீரான உணவு முறையே இதற்கான தீர்வு என்பதையும் மறக்கக் கூடாது.