நியூயார்க்: ரஷ்யாவின் படையெடுப்பை முடிவுக்குக் கொண்டுவர தீர்க்கமாகச் செயல்படுமாறு உக்ரைன் அதிபர் ஜெலென்ஸ்கி ஐநாவில் உலகத் தலைவர்களுக்கு அழைப்பு விடுத்தார்.

அப்போது அவர் பேசியதாவது: ரஷ்யாவின் போரை நிறுத்த வேண்டும். ரஷ்யாவின் படையெடுப்பை முடிவுக்குக் கொண்டுவர தீர்க்கமாகச் செயல்பட வேண்டும். அவ்வாறு செய்யத் தவறினால் ஆபத்தான உலகளாவிய ஆயுதப் போட்டியைத் தூண்டும் அபாயம் ஏற்படும். ரஷ்ய அதிபர் புடின் உக்ரைனின் எல்லைகளுக்கு அப்பால் போரை விரிவுபடுத்த முயற்சிக்கிறார்.ரஷ்ய ட்ரோன்கள் மற்றும் ஜெட் விமானங்கள் நேட்டோ வான்வெளியில் அத்துமீறி நுழைகின்றன.

உக்ரைன் உள்நாட்டில் தயாரிக்கப்பட்ட ஆயுதங்களை ஆதரவாக இருக்கும் நாடுகளுக்கு ஏற்றுமதி செய்யத் தொடங்கும். நடந்து வரும் போரில் சோதிக்கப்பட்ட உபகரணங்களை வழங்குவோம். ரஷ்ய அதிபர் புடின் இந்த முழு அளவிலான ஆக்கிரமிப்பைத் தொடங்கியிருக்காவிட்டால் இவை எதுவும் நடந்திருக்காது.

ஆயிரக்கணக்கான உக்ரைன் குழந்தைகளை கடத்துவது மற்றும் ஐரோப்பாவின் மிகப்பெரிய சபோரிஜியா அணு மின் நிலையத்தின் மீதான தொடர்ச்சியான தாக்குதல்களை நிறுத்த வேண்டும். நேற்று, ஆலை மீண்டும் மின் தடைக்கு உள்ளானது.இது பேரழிவு அபாயத்தை அதிகரித்தது. இவ்வாறு ஜெலன்ஸ்கி பேசினார்.