அடுத்த அதிர்ச்சி!

கிழக்காசிய நாடான ஜப்பானில், டோக்கியோ சர்வதேச விமான நிலையம் உள்ளது. சப்போரோ நகரிலிருந்து 379 பயணியருடன் புறப்பட்ட 'ஏர்பஸ் ஏ350' என்ற விமானம் நேற்று டோக்கியோ சர்வதேச விமான நிலைய ஓடுபாதையில் தரையிறங்கியது. அதே ஓடுபாதையில் ஜப்பானின் கடலோர பாதுகாப்பு படையின் ரோந்து விமானம் ஒன்று எதிர்பாராத வகையில் குறுக்கிட்டது. அப்போது தரையிறங்கி கொண்டிருந்த பயணியர் விமானத்தின் இறக்கை ரோந்து விமானத்தின் மீது மோதியது.மோதிய மறுநொடி ரோந்து விமானம் வெடித்துச் சிதறி, பல அடி உயரத்திற்கு தீ பிழம்பை கக்கியது. ரோந்து விமானத்தில் இருந்த ஐந்து ஊழியர்கள் இறந்ததாகவும், விமானி மட்டும் தப்பித்ததாக ஜப்பான் அரசு ஊடகம் தெரிவித்தது. இந்த விபத்தில் பயணியர் விமானத்தின் இறக்கை மற்றும் இன்ஜின் பகுதிகளிலும் தீ பிடித்தது. விமான நிலைய கட்டுப்பாட்டு அறையில் இருந்தவர்களால் எடுக்கப்பட்ட, 'வீடியோ' காட்சிகள் சமூக வலைதளங்களில் பரவின. இந்த விபத்தின் போது, சாதுர்யமாக செயல்பட்ட பயணியர் விமானத்தின் விமானி, வெடித்து சிதறிய ரோந்து விமானத்தில் இருந்து தொலைவாக சென்று நிறுத்தினார். உடனே அவசர அவசரமாக கதவு கள் திறக்கப்பட்டு, பயணியர் அனைவரும் பாதுகாப்பாக சறுக்கியபடி வெளியேறினர். தீயணைப்பு வீரர்கள் 40க்கும் மேற்பட்ட வண்டிகளில் விரைந்து தீயை அணைக்க முயன்றனர். ஆனால் பயணியர் விமானம் முற்றிலுமாக எரிந்து போனது.