நேரடியாக மோத தயாரா?

சுயசரிதை இறுதி பகுதியில், 'சுயமரியாதையை காக்க எழுதிய கடிதம்' என்ற தலைப்பில் ஒரு செய்தி உள்ளது. கள்ளச்சாராய ஒழிப்பு கலால் பிரிவு துணைத் தலைவருடன் ஏற்பட்ட மோதல் பற்றிய அதன் விபரமாவது:சென்னை நகர ஆணையராக இருந்த போது, கலால் பிரிவு துணைத்தலைவர் ஒரு பரிந்துரை அனுப்பியிருந்தார். மேலும் சில தகவல்கள் வேண்டியிருந்ததால் அது நிறுத்தி வைக்கப்பட்டது.
மறுநாள் கலால் பிரிவு கூட்டத்தில், ' சாராய வியாபாரிகளை குண்டர் சட்டத்தில் அடைக்கும் ஆணையில் கையெழுத்திட, கமிஷனர் தேவாரம் பயப்படுகிறாரா...' என்று துணைத்தலைவர் கூறியதாக தகவல் கிடைத்தது. இதை ஊர்ஜிதம் செய்ததும், அவருக்கு அலுவலக ரீதியாக ஒரு கடிதம் எழுதினேன். அதில், 'நான் மனித குணங்கள் பல பெற்றுள்ளேன். அதில், பயம் என்பது என்னிடம் சிறிதும் இல்லை. கடவுளுக்கு மட்டுமே அஞ்சுவேன். அவரால் படைக்கப்பட்ட எதற்கும் அஞ்சுவதில்லை...
'ஒரு குற்றவாளிக்கு அஞ்சுகிறேன் என்று நீங்கள் கூறியதை பெரும் அவமரியாதையாக கருதுகிறேன். இதற்கு உடனடியாக பதில் தெரிய வேண்டும். இடத்தையும், நேரத்தையும் தேர்ந்தெடுத்து தெரிவியுங்கள். எந்தவித ஆயுதம் வேண்டுமானாலும் வைத்துக்கொள்ளுங்கள். இரண்டு நாட்களுக்குள் முடிவை சொல்லுங்கள். மோதிப்பார்க்கலாம்...' என்று குறிப்பிட்டு அனுப்பியுள்ளார். பின், நிபந்தனையற்ற மன்னிப்பால் பிரச்னை முடிந்ததாக குறிப்பிட்டுள்ளார் தேவாரம்.