சென்னை,:பயணியரின் கோரிக்கையை ஏற்று, வாரம் இருமுறை இயக்கும் வகையில், துாத்துக்குடி - மேட்டுப்பாளையம் இடையே புதிய ரயிலை, வாரியம் அனுமதி அளித்துள்ளது. இந்த புது ரயில் சேவையை, மத்திய இணை அமைச்சர் முருகன், மேட்டுப்பாளையத்தில் இன்று கொடியசைத்து துவங்கி வைக்கிறார்.

இதேபோல், மூன்று பயணியர் ரயில்களின் சேவை நீட்டிப்பையும் அவர் துவங்கி வைக்கிறார்.

 துாத்துக்குடியில் இருந்து வாரந்தோறும் வியாழன், சனிக்கிழமைகளில் இரவு 10:50 மணிக்கு புறப்பட்டு, மறுநாள் காலை 7:40 மணிக்கு மேட்டுப்பாளையம் செல்லும். மறுமார்க்கமாக, மேட்டுப்பாளையத்தில் இருந்து வாரந்தோறும் வெள்ளி, ஞாயிறுகளில் இரவு 7:35 மணிக்கு புறப்பட்டு, மறுநாள் காலை 4:20 மணிக்கு துாத்துக்குடி செல்லும்.

இந்த ரயில், கோவில்பட்டி, சாத்துார், விருதுநகர், மதுரை, திண்டுக்கல், பழனி, பொள்ளாச்சி, கோவை வழியாக இயக்கப்படுகிறது

 கோவை - மேட்டுப்பாளையம் இடையே இயக்கப்படும் இரு பயணியர் ரயில்களும், நாளை முதல் போத்தனுார் வரை நீட்டித்து இயக்கப்பட உள்ளன

 கோவை - திருப்பதி இடையே இயக்கப்படும் விரைவு ரயில், வரும் 22ம் தேதி முதல் சாமல்பட்டி ரயில் நிலையத்தில் நின்று செல்லும்

 கர்நாடகா மாநிலம் மைசூரு - மயிலாடுதுறை விரைவு ரயில் இன்று முதல் கடலுார் துறைமுகத்துக்கு நீட்டித்து இயக்கப்பட உள்ளது

 மயிலாடுதுறை - திருச்சி இடையே வாரம் ஐந்து நாட்களில் இயக்கப்படும் விரைவு ரயில், நாளை முதல் தினமும் இயக்கப்படும் என, தெற்கு ரயில்வே தெரிவித்துள்ளது.