மனுவை படிப்பதுகூட இல்லையோ…!

முதல்வரின் முகவரிக்கு அனுப்பப்படும் மனுக்களுக்கு, 30 நாளில் ஏதோ ஒரு பதிலளித்து, கணக்கை முடித்துவிடவேண்டும் என்பது, அதிகாரிகள் சிலரின் எண்ணமாக உள்ளது. சம்பந்தமே இல்லாத பதிலளிப்பதால், மனுவை அதிகாரிகள் சரியாக படித்துக்கூட பார்ப்பதில்லையோ என்கிற சந்தேகம் மக்களுக்கு எழுகிறது. திருப்பூரை சேர்ந்த தன்னார்வலர் ஒருவர், 'திருப்பூர் - ஊத்துக்குளி ரோடு, சர்க்கார் பெரியபாளையத்தில், அனுமதியின்றி பள்ளி கட்டடம் கட்டப்பட்டுவருகிறது. பள்ளிக்கு, தடையின்மை சான்று வழங்க கூடாது' என, முதல்வரின் முகவரிக்கு கடந்த ஜூன், 28ல் புகார் மனு அனுப்பியுள்ளார்.இதற்கு, மாவட்ட வனத்துறை அதிகாரிகள், 'மனுதாரரின் கோரிக்கை ஏற்கப்பட்டது. கூலிபாளையம் நஞ்சராயன் குளம் பறவைகள் சரணாலயத்தில், நில அளவை செய்யப்பட்டு பணி நடைபெற்றுவருகிறது. சூழல் சுற்றுலா பணிகளை துவங்க விரிவான திட்ட அறிக்கை தயார் செய்யப்பட்டுவருகிறது' என சம்பந்தமே இல்லாமல் பதில் அனுப்பியுள்ளனர்.